एमाले अध्यक्ष केपी शर्मा ओली र नेकपा एकता राष्ट्रिय अभियानका संयोजक वामदेव गौतमबीच भेटवार्ता भएको छ।
एमाले मुख्यालय च्यासलमा आइतबार डेढ घन्टा भएको कुराकानीमा अध्यक्ष ओलीले पार्टीमा फर्कन आग्रह गरेको वामदेव निकट नेताले जानकारी दिए।
‘केपी ओलीले फर्किएर पार्टी काममा क्रियाशील भइहाल्नुस् भन्नुभएको थियो,’ स्रोतले भन्यो, ‘उहाँले मेरो व्यवस्थापन कसरी गर्नुहुन्छ भनेर सुोध्नुभयो।’
ओलीले व्यवस्थापनको कुरा जटिल नभएको बताएको वामदेव निकट नेताले भने।
एमालेको जेठ १९ गते बसेको सचिवालय बैठकले विधानको धारा ८९ मा रहेको ७० वर्षे उमेर हद निलम्बन गर्ने निर्णय गरेको छ।
दुनियाँका उमेर हदको व्यवस्था कतै नभएको र प्रगतिलाई रोक्ने भएकाले हटाइएको अध्यक्ष ओलीले बताएका छन्।
एमालेले उमेर हद फुकुवा गरेपछि पार्टीमा फर्कन वामदेव उत्साहित भएको नेताहरूले बताएका छन्। यसअघि ओली र गौतमबीच दुईपटक भेटवार्ता भएको थियो। कुराकानीमा राष्ट्रिय सभाका सदस्यसमेत रहेका गौतमले उमेर हद हटाउन भन्दै आएका थिए।
