राष्ट्रिय स्वतन्त्र पार्टीका सांसद मनिष झाले जनता बाढी पहिरोले आतंकित भएको समयमा गृहमन्त्री भने मोर्चा बनाउनमै व्यस्त भएको बताएका छन्।
सोमबार प्रतिनिधि सभा बैठकको शून्य समयमा बोल्दै सांसद झाले बाढी पहिरोबाट हुनसक्ने क्षति न्युनिकरण र पूर्वतयारीबारे सांसदहरूलाई जानकारी गराउन छोडेर गृहमन्त्री मोर्चा बनाउन व्यस्त भएको बताएका हुन्।
'आज पहाड जोखिममा छ। भोलि तराई र मधेश जोखिममा हुनेछ। गृहमन्त्री र उहाँको तयारीका बारेमा जानकारी पाइरहेका छैनौं,' उनले भने, 'शायद उहाँ मोर्चा बनाउनमा व्यस्त हुनुहुन्छ।'
सांसद झाले बाढी पहिरोको क्षति न्यूनिकरण, उद्दार र राहतका सम्बन्धमा सरकारले संसदलाई जानकारी गराउन माग गरे।
'हामीले जनप्रतिनिधि हौं। हामीले पनि जवाफ दिनुपर्छ तर प्रश्न कसलाई सोध्ने ? जवाफ कहाँबाट अपेक्षा गर्ने। जवाफ चाहन्छौ यसका लागि अनुरोध गर्छौं,' उनले भने।
