राष्ट्रिय स्वतन्त्र पार्टीका सांसद स्वर्णिम वाग्लेले अहिलेको बजेटले अथाह सम्भावना भएको आइटी क्षेत्रलाई बेवास्ता गरेको बताएका छन्।
मंगलबारको प्रतिनिधिसभा बैठकमा बोल्दै उनले वर्तमान सरकारले ल्याएको बजेटले अथाह सम्भावना भएको आइटी क्षेत्रलाई बेवास्ता गरेको बताए।
‘नेपालमा आइटी क्षेत्रको सम्भावना कति छ? विदेशको काम गर्ने नेपाली कति छन्? भनेर हामीले निजी क्षेत्रबाट अध्ययन गरेका थियौं। यसको प्रारम्भिक तथ्यांकहरू सुन्दाखेरि नेपालको आर्थिक ‘लेन्डस्किप’मा नै सानोतिनो भूकम्प ल्याउने खालको अनुमान गर्न सकिन्छ,’ उनले भने, ‘यो नयाँ रूपान्तरणकारी सेक्टरमा हामीले उही झारा टार्ने डिजिटल अर्थतन्त्र अपनाइने छ भन्ने भाषामा खुम्चिएका छौं। तर, जुन रूपान्तरणकारी सम्भावना छ, त्यसबारे हामीले सम्बोधन गरेकै छैनौं।’
उनले नेपालको अथाहा सम्भावना भएको भनिएको पर्यटन क्षेत्र भन्दा पनि ठूलो सम्भावना आइटी क्षेत्रमा रहेको बताए। त्यस क्षेत्रलाई प्राथमिकता दिनसके मात्रै मुलुकलाई समृद्ध बनाउन सकिने उनको भनाई छ।
उनले भपे, ‘पर्यटन हाइभ्यालु एग्रिकल्चरका विषयमा धेरै साथीहरूले भनिसक्नुभएको छ। आज आइटीको अथाहा सम्भावनालाई हामी त्यसको भ्याउनै पाउन सकेका छैनौं। खोस्रनै सकेका छैनौं।’
