नेकपा (माओवादी केन्द्र)ले केन्द्रीय समितिको बैठक बोलाएको छ।
पार्टी अध्यक्ष पुष्पकमल दाहाल प्रचण्ड र महासचिव देव गुरूङले परिपत्र पठाएर बैठकको जानकारी गराएका हुन्
बैठक आगामी असार २३ गते ११ बजे प्रज्ञा भवन कमलादीमा बस्नेछ।
‘केन्द्रीय समितिको बैठकमा केन्द्रीय समितिका सदस्यहरू, तीनवटै आयोगका सदस्यहरू र सबै प्रदेश समितिका पदाधिकारीहरू सहभागी हुने भएकाले आआफ्ना प्रदेशका सम्बन्धित कमरेडहरूलाई जानकारी गराउनु हुनेछ,’ परिपत्रमा भनिएक्को छ।
अध्यक्ष प्रचण्ड र महासचिव गुरूङले सर्कुलर गरेको पत्रमा २ महिने अभियानको समग्र समीक्षा सहितको लिखित प्रतिवेदन यही असार १५ गतेभित्र बुझाउन भनिएको छ।
त्यस्तै, तीन तहका सम्पन्न निर्वाचनमा भएका घात–अन्तरघात र कमीकमजोरीहरू भए त्यसको समेत लिखित प्रतिवेदन पठाउन सर्कुलर गरिएको छ।
यो प्रतिवेदन पनि असार १५ भित्रै पठाउन निर्देशन दिइसकेको छ।
‘पार्टी केन्द्रलाई दिनपर्ने केही सुझावहरू भए केन्द्रीय सदस्य, केन्द्रीय विभागका प्रमुखहरू, मोर्चाका फ्याक्सन इञ्चार्जहरूसमेत सबैले लिखित रूपमा २०८० साल असार १५ गतेभित्र केन्द्रीय कार्यालयमा पठाउन सकिने छ,’ निर्देशनमा भनिएको छ, ‘लेवी बुझाउन बाँकी रहेका सबै केन्द्रीय सदस्यहरू, प्रदेशहरूले बुझाउनु पर्ने २० प्रतिशत लेवी र २०७८ पुसमा सम्पन्न भएको ऐतिहासिक आठौं महाधिवेशनको हिसाब फछ्यौट गर्न बाँकी रहेका प्रदेशहरूले समेत आगामी केन्द्रीय समितिको बैठक अगावै अनिवार्य रूपमा हिसाब मिलान गरी फछ्यौट गर्न समेत निर्देशन गरिन्छ।’
