एकीकृत समाजवादीले यथास्थितिमा बजेट पारित गर्न नहुने निष्कर्ष निकालेको छ।
बिहीबार सिंहदरबारमा बसेको संसदीय दलको झण्डै चार घन्टा लामो छलफलले बजेट असन्तुलित रहेको निष्कर्ष निकालेको पार्टी उपाध्यक्ष राजेन्द्र पाण्डेले जानकारी दिए।
‘बजेट असन्तुलित छ, समर्थन गर्न सकिँदैन भन्ने नै सबैको साझा बुझाइ रह्यो,’ पाण्डेले सेतोपाटीसँग भने, ‘यथास्थितिमा बजेटमा समर्थन गर्न सकिँदैन।’
उनका अनुसार पार्टी संसदीय दलका नेता माधवकुमार नेपालले पनि बजेटले सन्तुलन कायम गर्न नसकेको विचार व्यक्त गरेका थिए।
अब प्रधानमन्त्री पुष्पकमल दाहाल प्रचण्ड र अर्थमन्त्री प्रकाशशरण महतसँग छलफल गर्ने पनि उनले बताए।
‘यही अवस्थामा बजेटमा समर्थन गर्न सकिँदैन भनेर हामी प्रधनमन्त्री, अर्थमन्त्रीलाई भन्छौं, सच्याउन आग्रह गर्छौं,’ उनले भने।
प्रधानमन्त्री प्रचण्ड, अर्थमन्त्री महत र कांग्रेस सभापति शेरबहादुर देउवाले आफ्नो जिल्लामा केन्द्रित गरेर बजेट एकोहोर्याएको भन्दै एकीकृत समाजवादीका अध्यक्ष नेपालले सहमति राखेका छन्।
उपाध्यक्ष पाण्डेले त यही परिस्थितिमा बजेटलाई समर्थन गर्न नसक्ने अडान दोहोर्याइरहेका छन्।
