प्रधानमन्त्री पुष्पकमल दाहाल ‘प्रचण्ड’ले मधेशमा कम बजेट विनियोजन भएको कुरा साँचो नभएको बताएका छन्।
प्रतिनिधि सभामा प्रधानमन्त्रीसँग प्रश्नोत्तर कार्यक्रममा नेपाली कांग्रेसका सांसद अजयकुमार चौरसियाले ७० प्रतिशत राजस्व उठ्ने र जनसंख्या पनि अन्य प्रदेशभन्दा बढी भएको मधेशमा कम बजेट विनियोजन गरिएको बताउँदै त्यसबारेमा प्रधानमन्त्रीसँग जवाफ मागेका थिए।
‘वीरगञ्ज प्राथमिकतामा किन परेन ? वीरगञ्ज सहर स्तरोन्नतीका लागि के कार्यक्रम आएको छ ? नारायणी उपक्षेत्रीय अपक्षेत्रीय अस्पताल, ठाकूराम बहुमुखी क्याम्पस, आदर्शनगर र नारायणी रंगशालाको स्तरोन्नतीका लागि कति रकम विनियोजन भएको छ?,’ उनले प्रधानन्त्रीलाई सोधे।
जवाफमा प्रधानमन्त्री प्रचण्डले मधेस प्रदेशमा पनि यथेष्ट बजेट छुट्याइएको दाबी गरे।
उनले संघीयताको मर्म अनुरुप संघबाट प्रदेश र स्थानीय तहमा हुने वित्तीय हस्तान्तरणको १५ प्रतिशतभन्दा बढी रकम मधेश प्रदेशमा नै जाने गरेको बताए।
‘यसका अतिरिक्त संघबाट सञ्चालन हुने पूर्वपश्चिम राजमार्ग, पथलहिया-वीरगंज करिडोर , चन्द्रपुर- गौर राजमार्ग, हुलाकी राजमार्ग, सुनकोशी- मरिण डाइभर्सन, बागमती-कमला-चन्द्रनहर लगायतका सिञ्चाइ आयोजना विभिन्न औद्योगिक पूर्वाधार तथा व्यापारिक पूर्वाधार आयोजनाहरू, तराई मधेसलाई लक्षित गरी अगाडि बढेका छन्,’ उनले भने।
त्यस्तै तराइ- मधेश समृद्धि कार्यक्रम, मधेसलाई काठमाडौंसँग जोड्ने द्रुतमार्ग लगायतका ठूला परियोजनाहरू मधेश प्रदेशमा नै पर्ने र तिनको समयवद्ध कार्यान्वयनका लागि यथेष्ट बजेट विनियोजन गरेको प्रधानमन्त्री प्रचण्डले बताए।
उनले मधेशमा संचालनमा रहेका कार्ययोजनाहरूमा आवश्यकताका आधारमा बजेट विनियोजन हुने भएकाले बजेटको अंकसँगै त्यसले पार्ने बृहत्तर प्रभावलाई समेत सकारात्मक रूपमा लिइदिन सांसदहरूला आग्रह गरे।
प्रधानमन्त्री प्रचण्डले वीरगञ्जको विकास सरकाको प्राथमिकतामा रहेको बताए।
त्यस्तै नारायणी रंगशालामा आगामी वर्षका लागि १ करोड ५० लाख, नारायणी अस्पतालका लागि ४१ करोड ३० लाख, ठाकुरराम बहूमुखी क्याम्पसका लागि विश्वविद्यालय अनुदान आयोगमार्फत अनुदान जाने व्यवस्था मिलाइएको प्रधानमन्त्रीले बताए।
