नेकपा एमालेका सांसद योगेश भट्टराईले नेपाल वायुसेवा निगममा नयाँ कर्मचारी भर्ती गर्नु नेपाल आमाको रगत खानुसरह भएको टिप्पणी गरेका छन्।
शुक्रबार प्रतिनिधि सभा बैठकमा मन्त्रालयगत बजेटमाथिको छलफलमा बोल्दै सांसद भट्टराईले थला पर्न लागेको निगममा कर्मचारी भर्ना गर्न लागिएको भन्दै त्यसको आलोचना गरेका हुन्।
‘वायुसेवा निगमसँग ४ वटा जहाज छन्, ३ हजार कर्मचारी किन चाहियो?’ उनले भने, ‘जुन आमाको दुध आउँदैन, आमाको दुध चुसिराख्ने? त्यो आमाको रगत चुसेजस्तै हो। नेपाल वायुसेवा निगममा नयाँ कर्मचारी भर्ती गर्नु भनेको नेपाल आमाको रगत खानुजस्तै हो। आज त्यस्तै भइरहेको छ।’
भट्टराईले कर्मचारीहरू अहिलेपनि तलब भत्ता माग गर्दै सडकमा हिँडिरहेको बताउँदै निगमलाई संरचनागत हिसाबले सुधार गर्न आवश्यक रहेको बताए।
उनले एमाले नेतृत्वको सरकारको पालामा सर्वसाधारणले समेत शेयर पाउने गरी पब्लिक कम्पनीमा लानुपर्छ भन्ने निष्कर्षमा पुगेको तर त्यसपछिका सरकारले निजीकरण गरेको आरोप लगाए।
उनले निगमलाई सर्वसाधारण समेतलाई शेयर निष्कासन हुनेगरी पब्लिक कम्पनीमा लैजानुपर्ने बताए।
निगम ग्राउण्ड ह्यान्डलिङबाट धानिएको बताउँदै सांसद भट्टराईले निगमले ग्राउन्ड ह्यान्डलिङ नपाए थला पर्ने बताए। ‘भोलि अरू कुनै कम्पनीले त्योभन्दा बढी दिन्छु भन्यो भने दिने कि नदिने? वायुसेवा निगमले ग्राउण्ड ह्यान्डलिङ पाएन भने वायुसेवा निगम थला पर्छ। अर्को कुनै विकल्प छैन,’ उनले भने।
नेपालमा ११ वटा निजी कम्पनीले जम्मा ११ सय कर्मचारी राखेर चलाउँदा निगमले ३ हजार कर्मचारी राखेर ४ वटा जहाज उडान भर्ने हो भने निगम आवश्यक नै नभएको पनि बताए।
उनले त्रिभुवन अन्तर्राष्ट्रिय विमानस्थलको विकल्प निजगढ अन्तर्राष्ट्रिय विमानस्थलभन्दा अरू हुन नसक्ने पनि बताए।
त्रिभुवन अन्तर्राष्ट्रिय विमानस्थलले वार्षिक ८५ लाख यात्रुहरूलाई सेवा दिइरहेको अवस्थामा विमानस्थलको क्षमता अधिकतम ९० लाख रहेको भट्टराईको भनाइ छ।
उनले पोखरा र भैरहवामा अन्तर्राष्ट्रिय विमानस्थल बनेपनि ती विमानस्थललाई जनतालाई सहजता प्रदान गर्नका लागि भन्दा पनि पर्यटकीय विमानस्थल बनाउन आवश्यक रहेको बताए।
‘अहिले अन्तर्राष्ट्रिय उडान ९० वटा जति छ। अर्को वर्ष ११० वा ११५ अन्तर्राष्ट्रिय उडान हुनेबित्तिकै काठमाडौं विमानस्थल साँघुरो हुन्छ,’ उनले भने, ‘त्रिभुवन अन्तर्राष्ट्रिय विमानस्थलको विकल्प भनेको निजगढबाहेक अन्य हुन सक्दैन। निजगढ विमानस्थल सरकारले बनाउनै पर्छ। अर्को विकल्प छ जस्तो लाग्दैन।’
