नेपाली कांग्रेसका महामन्त्री गगन थापाले जिल्ला निर्वाचन कार्यालयहरू खारेज गर्ने निर्णयबाट पछि हटेकोमा सरकारलाई धन्यवाद दिएका छन्।
सरकारले बजेटमा निर्वाचन कार्यालय जिल्ला प्रशासनमा इकाइका रूपमा राख्ने प्रस्ताव गरेको थियो।
उक्त प्रस्तावप्रति सत्तारूढ दलहरू र प्रमुख प्रतिपक्षी नेकपा एमाले र रास्वपालगायतका सांसदहरूले विरोध गरेका थिए।
मंगलबार प्रतिनिधि सभा बैठकमा जवाफ दिँदै अर्थमन्त्री प्रकाशशरण महतले जिल्ला निर्वाचन कार्यालय खारेज नहुने प्रष्टाएका थिए।
एमाले र राप्रपा सांसदहरूले जिल्ला निर्वाचन कार्यालय खारेज गर्ने प्रस्ताव फिर्ता लिन माग गर्दै संसदमा अवरोध गरेपछि जवाफ दिँदै अर्थमन्त्री महतले निर्वाचन कार्यालयहरू खारेज नहुने बताएका थिए।
कांग्रेस महामन्त्री थापाले जिल्ला निर्वाचन कार्यालय जिल्ला प्रशासनमा गाभ्दा निर्वाचनको स्वतन्त्रता र निष्पक्षता संकुचित हुनेतर्फ यसअघि संसदमै ध्यानाकर्षणसमेत गराएका थिए।
‘सरकारले बजेटमार्फत गरेको जिल्ला निर्वाचन कार्यालयहरू खारेज गर्ने निर्णयले गर्दा संविधानले नै परिकल्पना गरेको निर्वाचनको स्वतन्त्रता तथा निष्पक्षता सङ्कुचित हुने अवस्था थियो,’ ट्वीट गर्दै थापाले भनेका छन्, ‘आफ्नो गलत निर्णयका कारण व्यहोर्न पर्ने दुष्प्रभावलाई मध्यनजर गर्दै उक्त निर्णयबाट पछाडि हटेकोमा सरकार र अर्थमन्त्रीलाई धन्यवाद।’
यो पनि: जिल्ला निर्वाचन कार्यालय खारेज गर्ने प्रस्ताव सरकारले सच्याउनुपर्छ: गगन थापा (भिडिओ)
