प्रधानमन्त्री पुष्पकमल दाहाल ‘प्रचण्ड’ले आफू नेतृत्वको सरकार पास मात्र नभइ मेरिटमै पास हुने दाबी गरेका छन्।
प्रतिनिधि सभाको सोमबार बसेको बैठकमा राष्ट्रिय स्वतन्त्र पार्टीकी सांसद सुमना श्रेष्ठले राखेको प्रश्नको जवाफ दिँदै प्रधानमन्त्री प्रचण्डले पास हुने कि फेल हुने भन्ने कुरा भविष्यले निर्धारण गर्ने भएपनि मेरिटमै पास हुने विश्वास व्यक्त गरे।
‘विद्यार्थीहरूको रिपोर्ट कार्डमा फूल मार्क्स र पास मार्क्स हुन्छ। प्रधानमन्त्रीको रिपोर्ट कार्डमा कति अंक आयो ? फेल भइन्छ कि भनेर जनतामाझ गएर सर्वे नगरिएको हो?,’ सांसद सुमनाको प्रश्न थियो, ‘मन्त्रिपरिषद्मा सहकार्य र समन्वय किन कमजोर?’
‘नम्बर कति आउने हो, पास हुने हो कि होइन भन्ने कुरा भविष्यले देखाउँछ,’ जवाफमा प्रधानमन्त्री प्रचण्डले भने, ‘पास मात्रै होइन मेरिटमै पास भइन्छ।’
प्रधानमन्त्री प्रचण्डले मन्त्रिपरिषद्मा समन्वय र सहकार्यको कमि भएको भने स्वीकार गरे। यी सबैलाई सुधार गर्नका लागि मन्त्रीपरिषद्का सबै सदस्य विशेषत प्रधानमन्त्रीको हैसियतले आफूले भूमिका खेल्न आवश्यक रहेको बताए।
