सर्वोच्च अदालतले राष्ट्रिय स्वतन्त्र पार्टीका सभापति रवि लामिछानेको सांसद पद खारेज गर्न माग गर्दै दायर गरेको रिट खारेज गरेको छ।
प्रधानन्यायाधीशसहित पाँच न्यायाधीशको संवैधानिक इजलासले उक्त रिट खारेज गरेको हो।
अदालतमा उनको अब नागरिकतामा प्रश्न उठाइएको कुनै पनि मुद्दा बाँकी नरहेको वरिष्ठ अधिवक्ता सुनिल पोखरेलले बताए।
‘अदालतमा अब उहाँको विषयमा निरूपण हुनुपर्ने एउटे विषय बाँकी छ। त्यो हो राहदानी प्रकरणमा मुद्दा नचलाउने महान्यायाधिवक्ता कार्यालयको निर्णयविरूद्ध परेको रिट’, उनले भने।
सिन्धुलीका युवराज सफलले लामिछानेले अमेरिकी नागरिकता त्यागेको निस्सा पेश नगरेको भन्दै सर्वोच्च अदालतमा रिट दायर गरेका थिए।
उनले निर्वाचन आयोगमा समेत अमेरिकी स्थायी बसोबास अनुमति पत्र (ग्रिन कार्ड) त्याग गरेर नेपालको नागरिकता लिने समयअवधिमा पनि प्रश्न उठाउँदै निवेदन दिएका थिए। तर निर्वाचन आयोगले उनको निवेदनमा कुनै कारबाही नगरेपछि युवराज सफल सर्वोच्च पुगेका थिए। योसँगै अब रवि लामिछानेको नागरिकतामाथि उठाइएको प्रश्नको समाधान भएको वरिष्ठ अधिवक्ता पोखरेलले बताए।
सफलले गत जेठ १० गते लामिछानेविरूद्ध संवैधानिक इजलासमा रिट दायर गरेका थिए।
