प्रतिनिधिसभाका सभामुख देवराज घिमिरेले संसद प्रभावकारी बनाउनेगरी भूमिका निर्वाह गर्न राजनीतिक पार्टीहरूलाई आग्रह गरेका छन्।
संसद जनअपेक्षा अनुसार चल्न नसकेको आम अनभूति भइरहेको उल्लेख गर्दै उनले त्यसलाई प्रभावकारी बनाउने गरी राजनीतिक पार्टीहरूले भूमिका निर्वाह गर्नुपर्ने बताएका हुन्।
६५ औं संसद दिवसको अवसर पारेर शनिबार काठमाडौंमा आयोजित एक कार्यक्रममा बोल्दै उनले संसद जनप्रतिनिधिहरूको सर्वोपरी संस्था भएकाले त्यसलाई प्रभावकारी बनाउने विषयमा पूर्व संसद क्लवभित्र छलफल गर्न उपयुक्त हुने धारणा समेत राखे।
‘मलाई लाग्छ–संसद प्रभावकारी हुनुपर्छ। यसमा कुनै बहस र विवादको विषय छैन। प्रभावकारी कति हुँदा हुन्छ? यसको मापन पनि यति हुनुपर्छ भन्ने हुन्न होला,’ उनले भने, ‘तर जे भएपनि जनअपेक्षा अनुरूपको हुन सकिरहेको छैन भन्ने आम अनभूतिहरू छ जस्तो मलाई पनि लाग्दछ। यसलाई प्रभावकारी पार्नमा मूलतः राजनीतिक पार्टीहरूको भूमिका प्रभावकारी हुन्छ।’
राष्ट्र र जनताको आवश्यक्ता अनुसार कानुन निर्माण गर्ने, भएका कानुनलाई सरकारले प्रभावकारी ढंगले कार्यान्वयन गर्दै जानुपर्ने सभामुख घिमिरेको भनाइ थियो।
‘संघीय संसद सर्वोपरी संस्था हो। यसले बनाउने नीति, कानुन, यसले बनाएको सरकार देशमा शासन गरिरहेको हुन्छ। यसले अहिलेको आवश्यक्ता र खाँचो अनुसार काम गर्न सकिरहेको छ कि छैन? छैन भने कानुनको अभाव छ भने कानुन बनऔं,’ उनले भने, ‘कार्यान्वयनको अभाव छ भने सरकार वा अन्य अंगहरूलाई याक्टिभ बनाउने काम गरौं। संविधान नै बाधक छ भने पनि यसको बारेमा छलफल चलाउन पूर्व सांसद क्लव उपयुक्त हुन्छ।’
