उपसभामुख इन्दिरा रानाले संसदभित्र मुलुकका सभामुखहरूको फोटो नराखेकोप्रति असन्तुष्टि जनाएकी छन्।
६५ औं संसद दिवसको अवसरमा शनिबार काठमाडौंमा आयोजित कार्यक्रमलाई सम्बोधन गर्दै उनले संसदमा सभामुखहरूको फोटो राख्ने परम्पराको थालनी हुनुपर्ने बताएकी हुन्।
उनले आफू केही समयअघि सिंगापुरको संसद भवनमा गरेको भ्रमणबारे बताउँदै संसदमा राखिएका सभामुखका तस्बिरबारे बताएकी थिइन्। त्यहाँको संसदमा विगतदेखि वर्तमानसम्मका सभामुखको तस्बिर राखेको पनि उनले बताइन्।
’अस्ति म सिंगापुर गएको थिएँ, डब्ल्यूटिओको कन्फ्रेन्समा, त्यहाँ पार्लियामेन्ट भिजिट गर्ने मौका पाएको थिएँ। त्यहाँ पहिलाका सभामुखज्यूले कस्तो टोपी लगाउनुहुन्थ्यो। कस्तो लुगा लगाउनुहुन्थ्यो?अहिलेको सभामुखले कस्तो लगाउनुहुन्छ? त्यो विकासक्रम अनुसार त्यसरी राख्नु भएको छ क्या हरेकको,’ उनले भनिन्, ‘हामीकहाँ खै त त्यस्तो? भित्र बस्नेबित्तिकै सम्माननीय सभामुखको यत्रो फोटो राख्नु भएको छ, हाम्रोचाहिँ छैन सम्माननीय सभामुखको। संसद्लाई नै अलिक बायस गरेजस्तो पनि लाग्छ। मैले यहीँबाट यो कुरा भन्दैछु। संसद्बाटै सरकार उत्पन्न हुने हो। सरकारकै कन्ट्रोलभित्र हुन्छ। हामीले यो कुरा पनि मनन गर्नुपर्छ। हामी सबैजना त्यही सदनबाट सबै जनताको सामु पुग्नेछौं।’
नेपालमा पनि सिंगापुरको संसद जसरी नै सभामुखहरूको अभिलेख राख्नुपर्ने उपसभामुख रानाको भनाइ छ।
*सच्याइएको
