नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टीले खेतिपाती गर्न आफ्ना नेता तथा कार्यकर्तालाई २० दिन ‘छुट्टी’ दिएको छ।
पार्टीबाट छुट्टी पाएपछि अहिले विप्लवसहित नेकपाका नेता कार्यकर्ता खेतिपातीका लागि आ-आफ्नो जिल्ला तथा क्षेत्रमा खटिएका छन्।
‘हाम्रो पार्टीले आत्मनिर्भर र अर्थतन्त्र जोडेर सबैलाई असार १० देखि ३० गतेसम्म कृषि कर्ममा खटिन विदा दिएको छ,’ नेकपाका एक नेताले सेतोपाटीसँग भने, ‘पार्टी महासचिव विप्लव पनि अहिले समाजवादी मोर्चाको बैठकसमेत स्थगित गरेर कपिलवस्तुको शिवगढीमा खेतीपातीमा व्यस्त हुनुहुन्छ।’
कृषि विदा रहेका बेला नेता-कार्यकर्ताले राजनीतिक गतिविधि केही पनि नगर्ने उनले बताए।
नेकपाले कपिलवस्तुमा विप्लव, चितवनमा खड्क विश्वकर्मा ‘प्रकाण्ड’ र बर्दियामा भरत बमको नेतृत्वमा धान रोपेको छ। गत असोजमा सम्पन्न नेकपाको नवौं महाधिवेशनले आधारभूत तरिकाबाट आत्मनिर्भर हुन श्रम र समयको सदुपयोग गर्ने निर्णय गरेको थियो।
त्यही निर्णयअनुरुप नै अहिले पार्टीका सबै पंक्तिका नेता-कार्यकर्ता खेतिपातीमा व्यस्त भएको नेकपाले जनाएको छ।