प्रमुख प्रतिपक्षी नेकपा एमालेले प्रधानमन्त्री पुष्पकमल दाहाल प्रचण्डको राजीनामा मागेको छ।
प्रतिनिधि सभाको बुधबारको बैठकमा आकस्मिक समय लिएर बोलेका एमाले सांसद रघुजी पन्तले प्रधानमन्त्री प्रचण्डको अभिव्यक्तिलाई लिएर राजीनामा माग गरेका हुन्।
‘प्रधानमन्त्रीको राजीनामा नआएसम्म यो बैठक अघि बढ्न सक्दैन,’ सांसद पन्तले भने, ‘प्रधानमन्त्रीको अभिव्यक्तिले नेपाली जनताको स्वाभिमानमाथि आघात पुगेको छ, यो दुर्भाग्यको दिन किन देख्नुपर्यो?’
उनले नेपालको संसद र जनताले प्रधानमन्त्री बनाउने बताए।
प्रधानमन्त्री दाहालले काठमाडौंमा मंगलबार आयोजित एक कार्यक्रममा आफूलाई प्रधानमन्त्री बनाउन प्रितम सिंह दिल्ली गएको अभिव्यक्ति दिएका थिए।
सभामुख देवराज घिमिरेले भने आकस्मिक समयमा सांसदलाई बोल्न समय दिएपछि एमालेका सांसदहरूले विरोध गरेका थिए। लगत्तै प्रतिपक्षी दल राप्रपाका सांसदहरूले पनि विरोध गरेका थिए।
प्रतिपक्षी दल एमाले र राप्रपाको विरोधपछि सभामुख घिमिरेले आधा घन्टाका लागि प्रतिनिधि सभा बैठक स्थगित गरेका छन्।
