बुधबार प्रतिनिधि सभाको बैठकमा मिटरब्याजीविरूद्धको अध्यादेश टेबल गर्ने कार्यसूची थियो। त्यस्तै केही नियमित कार्यसूची पनि थिए।
तर, प्रमुख प्रतिपक्षी दल नेकपा (एमाले) सदन नियमित कार्यसूचीमा अघि बढ्न सकेन।
प्रधानमन्त्री पुष्पकमल दाहाल ‘प्रचण्ड’ले सरदार प्रितम सिंहको जीवनीमा आधारित पुस्तक विमोचनमा दिएको अभिव्यक्तिले एमाले आक्रोशित भयो।
प्रधानमन्त्री प्रचण्डले राजीनामा दिनुपर्ने भन्दै आ-आफ्नो आसनबाट उठेर विरोध जनाएन मात्रै, वेल घेराउको प्रयास पनि गर्यो।
प्रधानमन्त्री प्रचण्डको अभिव्यक्तिलाई लिएर राष्ट्रिय स्वतन्त्र पार्टी र राष्ट्रिय प्रजातन्त्र पार्टीका सांसदहरूले पनि उठेर विरोध जनाए।
प्रधानमन्त्रीको अभिव्यक्तिलाई लिएर उठेर विरोध जनाएपछि सार्वजनिक रूपमा रास्वपाले पनि राजीनामा मागेको हो कि भन्ने सन्देश गएको भन्दै पार्टीका सांसदहरूले खण्डन गरेका छन्।
राष्ट्रिय स्वतन्त्र पार्टीका सांसद मनीष झाले प्रधानमन्त्रीको राजीनामा पार्टीको मागको विषय नभएको बताएका छन्।
‘केही कुराहरूमा आशंका र आक्रोश छ। प्रधानमन्त्रीले स्पष्ट पारिदिनुपर्छ,’ उनले भने, ‘अरू दलको माग, बोलीका विषयमा हामी जिम्मेवारी लिँदैनौं। विपक्षीको लहरमा बसेका भएर त्यस्तो देखियो होला मिडियाले एमालेसँग जोडेर परिचय स्थापित गर्न खोज्नु गलत छ। हाम्रो राजनीतिक परिचय र अस्तित्व फरक छ।, हामी फरक मत, पहिचानसहित त्यहाँ पुगेका छौं, हामीले प्रधानमन्त्रीको राजीनामा मागिरहेका छैनौं,’ उनले भने।
उनको प्रधानमन्त्रीको अभिव्यक्तिले सार्वभौम संसद, प्रधानमन्त्री निर्वाचित हुने प्रक्रियाको अवहेलना भएको उनको ठहर छ।
‘उहाँले भावनात्मक रूपमा आएर यत्तिकै विवेक गुमाएर दिनुभएको हो कि, कुन तर्कले बोल्नु भएको हो, त्यो स्पष्ट पारिदिन आग्रह गर्न चाहन्थ्यौं। तर, हामीले बोल्ने मौका पाएनौं,’ उनले भने।
यता एमालेले भने प्रधानमन्त्रीको राजीनामा नै बटम लाइन भएको बताएको छ। एमाले सांसद रघुजी पन्तले प्रधानमन्त्रीको अभिव्यक्तिले राष्ट्रको स्वाभिमान गिरेको टिप्पणी गरे।
यति मात्र होइन नेपाली कांग्रेस, जनता समाजवादी पार्टीलगायत दल पनि प्रधानमन्त्रीको अभिव्यक्तिप्रति रूष्ट रहेको पन्तले टिप्पणी गरे।
माओवादी केन्द्रका सांसदले भने प्रधानमन्त्री प्रचण्डले व्यक्तिको इच्छाको कुरा गरेको बताए।
‘कोही मानिस कसैको दीर्घायुको कामना गरेर होम गर्छन्। कसैले मन्दिरमा पूजा गर्छन्। व्यक्तिगत रूची र विशेषताका कुरा हुन्छन्। राष्ट्रिय, संस्थागत कुरा होइन, प्रधानमन्त्रीज्यूको रूचीको कुरा पनि होइन, त्यसको आसयमा कहीँ कतै चित्त नबुझे संसदमा बोलाएर सोधे भयो नि, त्यो अधिकार संसद्ले राख्छ। हरेक सांसदको त्यो अधिकार सुरक्षित छ। त्यो अधिकार हुँदाहुँदै, संसदीय प्रक्रिया र मर्यादाको बाटो हुँदाहुँदै संसद् अवरोध गर्नु मर्यादाको कुरा होइन, प्रक्रियाको कुरा यो होइन,’ ऊर्जा, जलस्रोत तथा सिँचाइमन्त्री शक्तिबहादुर बस्नेतले भने।
हेर्नुस् भिडिओ:
