नेपाली कांग्रेसका केन्द्रीय सदस्य शेखर कोइरालाले कोशी प्रदेशमा सरकार निमार्ण गर्दा विधि र पद्धति मिचिएको भन्दै विरोध जनाएका छन्।
सामाजिक सञ्जाल फेसबुकमा स्ट्याटस लेख्दै कोइरालाले सभामुख आफैंले हस्ताक्षर गरेर सरकार गठन गर्नु संवैधानिक सर्वोच्चता र लोकतान्त्रिक संसदीय पद्धतिको सिद्धान्तविपरीत भएको बताएका छन्।
नेता कोइरालाले प्रदेश संसदको सभामुख संलग्न भएको दलको समर्थनमा सरकार निर्माण हुने प्रक्रियामा सो दलले आफ्नो सदस्य संख्यामा सभामुखलाई समेत गणना गरेर पठाउने कुराको संवैधानिक व्याख्या नभए पनि यसो गर्नु संसदीय मान्यताविपरीत हुने बताएका छन्।
‘सभामुखको संवैधानिक भूमिका भनेको व्यवस्थापिका संसदको कार्य सञ्चालन र अध्यक्षता गर्नु हो,’ उनले भनेका छन्, ‘यदि संसदमा पेश भएको विषयमा मतदान भएको अवस्थामा मत बराबर भएमा निर्णायक मत जाहेर गर्ने बाहेक कार्यपालिका गठन, विघटन र समर्थनमा सक्रिय रही हस्ताक्षर गर्नु संसदीय लोकतन्त्रको मर्यादा, अभ्यास र कानुनी शासनको विपरीत हुन जान्छ।’
बिहीबार बिहान बसेको सत्ता साझेदार ७ दलको बैठकले कोशी प्रदेशमा सकारको दाबी गर्दा सभामुखको सहित हस्ताक्षर बुझाउन प्रदेशका गठबन्धन दलहरूलाई निर्देशन दिएका थिए। कोशीको सभामुख रहेका बाबुराम गौतम माओवादी केन्द्रका सांसद हुन्।
गौतमसहित सत्ता गठबन्धनसँग ४७ मत छ। यो संख्या प्रदेश सभाको बहुमत हो। कांग्रेस प्रदेश संसदीय दलका नेता उद्धव थापा कांग्रेस नेता कृष्णप्रसाद सिटौला पक्षधर हुन्। कांग्रेसको १४ औं महाधिवेशनमा सिटौला देउवा पक्षमा लागेका थिए।
