प्रतिनिधि सभाको अवरोध खुलाउन सभामुख देवराज घिमिरेले प्रमुख सचेतक, सचेतकहरूसँग छलफल गर्दैछन्।
सभामुख घिमिरेले अहिले बिहान ११ बजे प्रतिनिधि सभा कार्यव्यवस्था परामर्श समितिको बैठक बोलाएको उनका प्रेस संयोजक शेखर अधिकारीले जानकारी दिए।
‘प्रतिनिधि सभाको अवरोध हटाउनेबारे सभामुखले छलफल गर्न लाग्नु भएको हो,’ अधिकारीले भने।
नेकपा (एमाले) संसदीय दलका उपनेता सुवास नेम्वाङले प्रधानमन्त्री पुष्पकमल दाहाल ‘प्रचण्ड’ले राजीनामा नदिएसम्म संसद चल्न नदिने पार्टीको अडान यथावत् रहेको बताए।
‘सभामुखले प्रमुख सचेतक, सचेतकहरूलाई बोलाउनु भएको छ भन्ने सुनेका छौं, हाम्रो कुरा यथावत छ,’ उनले भने।
प्रचण्डले गत असार १८ गते आफूलाई प्रधानमन्त्री बनाउन सरदार प्रितम सिंह पटकपटक दिल्ली (भारतको राजधानी) गएको भन्दै विवादास्पद अभिव्यक्ति दिएका थिए।
सिंहको जीवनकथामा आधारित पुस्तक विमोचनमा प्रधानमन्त्री प्रचण्डले यस्तो अभिव्यक्ति दिएपछि एमालेले राजीनामा मागेको हो।
राष्ट्रिय स्वतन्त्र पार्टी (रास्वपा)ले प्रधानमन्त्रीको स्पष्टीकरण माग गरेको छ। प्रधानमन्त्रीको अभिव्यक्तिले देशको सार्वभौमिकता कमजोर बनाएको उसले निष्कर्ष निकालेको छ।
बुधबार प्रतिनिधि सभा बैठकमा राष्ट्रिय प्रजातन्त्र पार्टीले पनि उठेर विरोध जनाएको थियो।
