उपप्रधानमन्त्री तथा गृहमन्त्री नारायणकाजी श्रेष्ठले सुशासन र समृद्धिको आन्दोलनमा वलिदान नै दिन परेपनि पछि नहट्ने बताएका छन्।
शुक्रबार निजी निवासमा पत्रकारहरूसँग कुरा गर्दै उपप्रधानमन्त्री श्रेष्ठले मुलुकमा राजनीतिक परिवर्तनका लागि दसौं हजारले वलिदान गरेको र त्यही राजनीतिक परिवर्तनको उद्धेश्य प्राप्तिका लागि अहिले भएको नयाँ खालको आन्दोलनमा वलिदान गर्न आफूहरू तयार रहेको बताएका हुन्।
उनले भ्रष्टाचारविरूद्धको अभियानका क्रममा विभिन्न किसिमका धम्कीहरू आउने गरेको तर त्यसलाई चासो नदिई सुशासन र समृद्धिको पक्षमा सरकार निरन्तर दृढ भएर लागेको बताए।
‘दसौं हजारको वलिदानबाट राजनीतिक परिवर्तन ल्याएको होइन? अनि यो परिवर्तन केका लागि?’ उनले भने, 'सामाजिक आर्थिक रूपान्तरण गर्न र नेपाली जनताहरूको जीवन बदल्न होइन? यो नयाँ प्रकारको आन्दोलनमा हामी बलिदान हुन नपरे किन तयार नहुने?’
उपप्रधानमन्त्री श्रेष्ठले पैसा कमाउनकै लागि आफ्नै देशको नागरिकलाई अनागरिक बनाउने र शरणार्थीका रूपमा विदेश पठाउनेजस्तो निकृष्ट हर्कत भएकाले आफू चुप लागेर बस्न नसकेको बताए।
उनले प्रधानमन्त्री सुशासनको पक्षमा अहिले अत्यन्त दृढ रहेको बताए।
‘अहिले बेथितिलाई अन्त्य गर्न, राष्ट्रविरोधी कमिशनखोरको जालोलाई तोड्न, कमिशनका निम्ति राज्यलाई धोका दिने नोक्सान गर्ने, यसमा संलग्नहरु र भ्रष्टाचारीहरूलाई कारबाही गर्न ठग र अपराधीहरूलाई कारबाही गर्न कुनै सम्झौता हुँदैन,’ उनले भने।
उपप्रधानमन्त्री श्रेष्ठले मधेसमा १३ सय भन्दा बढी मिटरब्याज पीडितले न्याय पाएको बताए।
