सत्ता पक्ष र एमालेबीच कुरा नमिल्दा प्रतिनिधि सभा बैठक आज बस्न सकेन। आज बस्न नसकेको बैठक आइतबार दिउँसो १ का लागि बोलाइएको छ।
प्रमुख प्रतिपक्षी दल नेकपा (एमाले)ले प्रधानमन्त्री पुष्पकमल दाहाल ‘प्रचण्ड’ले राजीनामा नदिएसम्म प्रतिनिधि सभा बैठक चल्न नदिने अडान राखेको छ।
प्रधानमन्त्री पुष्पकमल दाहाल ‘प्रचण्ड’ले गत असार १८ गते आफूलाई प्रधानमन्त्री बनाउन प्रितम सिंह धेरैपटक दिल्ली गएको भन्दै विवादास्पद अभिव्यक्ति दिएका थिए। प्रधानमन्त्री प्रचण्डले सिंहकै जीवनीमा आधारित पुस्तक विमोचनमा उक्त अभिव्यक्ति दिएका थिए।
त्यसैको विरोधमा एमालेले बुधबारको संसद् बैठकमा प्रधानमन्त्रीको राजीनामा माग गरेको थियो भने राष्ट्रिय स्वतन्त्र पार्टी र राष्ट्रिय प्रजातन्त्र पार्टीले समेत उठेर विरोध जनाएका थिए।
प्रतिनिधि सभाको अवरोध हटाउन सभामुखले शुक्रबार दिउँसो सिंहदरबारमा कार्यव्यवस्था परामर्श समितिको बैठक राखेका थिए। बैठकमा सत्ता पक्ष र एमालेबीच कुरा नमिलेको हो।
एमालेले प्रधानमन्त्रीको राजीनामाबाहेक अरू कुनै कुरामा सहमति गर्न नसकिने बताएको छ भने सत्ता पक्षका दलहरूले यसबारेमा प्रधानमन्त्रीले संसदमा आफ्ना कुरा राख्न पाउनु पर्ने अडान राखेका छन्।
बैठकमा सभामुख देवराज घिमिरेले सत्तापक्ष र प्रमुख विपक्षीबीच घनिभूत छलफल गरेर भोलिसम्ममा सहमति गर्न प्रस्ताव गरेका थिए।
‘सत्तापक्ष र प्रमुख विपक्षीबीच घनिभूत छलफल गरेर भोलिसम्ममा सहमति गर्नुहोला। संसद अवरुद्ध हुँदा विधेयक (खासगरी मिटरब्याज सम्बन्धी) निष्क्रिय हुनु राम्रो हुँदैन,’ सभामुखको भनाइ उद्धृत गर्दै उनका प्रेस संयोज शेखर अधिकारीले भने, ‘तपाईंहरू एउटा निष्कर्षमा पुग्नैपर्छ । त्यसका लागि सहजीकरण गर्न म तयार छु। भोलि-पर्सिसम्ममा सहमति गर्नुहोला। आजको बैठक सूचना टाँसेर स्थगित गरौं।’
त्यसपछि सूचना टाँस गरेर बैठक स्थगित भएको हो।
प्रतिनिधि सभाको बैठक अवरोध भएपछि मिटरब्याजसम्बन्धी अध्यादेश नै टेबल हुन सकेको थिएन।
अत्यावश्यक कानुन नै निष्क्रिय हुने र मिटरब्याजीपीडितहरू झन् मर्कामा परेको हुँदा सभामुखले अवरोध खुलाउन तदारूकता देखाएका हुन्।
