प्रतिनिधि सभाको अवरोध हटाउन नेकपा (एमाले)ले पुनः अर्घेल्याइँ गरेको छ।
प्रधानमन्त्री पुष्पकमल दाहाल ‘प्रचण्ड’को चित्तबुझ्दो स्पष्टीकरण आए संसद् बैठकलाई नियमित कामकारबाही अगाडि बढाउन दिने सहमति गरेको नेकपा एमाले पुनः पछि हटेको हो।
नेकपा एमालेका अध्यक्ष केपी शर्मा ओलीले प्रधानमन्त्री प्रचण्डको राजीनामाको अडान दोहोर्याएका छन्।
‘संसद प्रधानमन्त्रीले बन्द गराउनु भएको हो, हामीले होइन। उहाँले हामीमाथि गम्भीर आरोप लगाउनु भएको छ, त्यो फिर्ता लिनु भएको छैन। त्यो कायम राखेर सहमति हुँदैन,’ अध्यक्ष ओलीले आइतबार दिउँसो संसद् भवन परिसरमा पत्रकारहरूसँग कुरा गर्दै भने।
प्रधानमन्त्री प्रचण्डले २१ गते एमालेमाथि गम्भीर लाञ्छना लगाएको भन्दै त्यो फिर्ता लिनुपर्ने ओलीको अडान थियो।
‘प्रचण्डको २१ गतेको वक्तव्य हेर्नुहोस हाम्रो राजीनामा नै माग छ। राजीनामा दिएपछि सहमति जुट्छ,’ उनले भने।
