परराष्ट्रमन्त्री नारायणप्रकाश साउदले रिक्त राजदूतहरू केही दिनमै टुंगो लाग्ने बताएका छन्।
प्रतिनिधि सभाअन्तर्गतको अन्तर्राष्ट्रिय सम्बन्ध र पर्यटन समितिको सोमबार बसेको बैठकमा बोल्दै उनले राजदूत नियुक्ति प्रक्रिया अघि बढेको बताएका हुन्।
‘केही दिनमा राजदूत नियुक्ति टुंगो लाग्छ, पासपोर्टका लागि निर्णय भएको छ, ६० लाख पासपोर्ट छपाइको निर्णय भइसकेको छ, मुलुकलाई पासपोर्ट अभाव हुन नदिन टेन्डर प्रक्रिया छिट्टै अगाडि बढाउँछौं, हामीलाई पाच वर्ष पासपोर्ट अभाव हुँदैन,’ मन्त्री साउदले समितिको बैठकमा भने।
यस्तै कांग्रेस सांसद नारायण खड्काले परराष्ट्र मन्त्रालयलमा दुई जना सचिव चाहिने धारणा राखे। उनले एक जना प्रशासन र अर्को कन्सुलर हेर्नेगरी सचिव राख्नुपर्ने बताए।
युरोपमा ४० हजार रोजगारीको अवसर खुलेको बताउँदै नेपालमा रोजगारीको क्षेत्र व्यवस्थित गर्नुपर्ने धारणा राखे।
यता नेपाल मजदूर किसान पार्टीका सांसद प्रेम सुवालले विदेशी सेनामा भर्ती भएका नेपालीबारे सरकारलाई थाहा छ कि छैन भनेर टिप्पणी गरे।
‘युरोप अमेरिकामा कति नेपाली छन्, कति नेपाली विदेश गएका छन्? कति नेपाली विदेशी सेनामा भर्ती भएका छन्? सत्ता र विपक्षी दलका सांसद अमेरिका गएका छन्, त्यहाँ पनि यस्तै झगडा गर्छन् कि मिल्छन्?, उता मिल्छन भने उतै बैठक बस्ने हो कि?,’ उनले टिप्पणी गरे।
