नेकपा (एमाले)का अध्यक्ष केपी शर्मा ओलीले उपाध्यक्षहरूसँग छलफल थालेका छन्। पार्टी संगठन सुदृढीकरण र परिचालनका लागि छलफल थालेको उपाध्यक्षहरूले बताएका छन्।
अध्यक्ष ओलीले पार्टीका वरिष्ठ उपाध्यक्ष ईश्वर पोखरेल, उपाध्यक्षहरू युवराज ज्ञवाली, अष्टलक्ष्मी शाक्य, रामबहादुर थापा ‘बादल’, सुरेन्द्र पाण्डे, सुवास नेम्वाङ र विष्णु पौडेलसँग छलफल थालेका हुन्।
अध्यक्ष ओलीले बुधबार पनि उपाध्यक्षहरूसँग छलफल गरेका थिए।
‘हिजो प्रधानमन्त्री पुष्पकमल दाहाल ‘प्रचण्ड’की पत्नी सीताको निधन भएका कारण विषयमा आधारित भएर छलफल गर्न पाइएन,’ उपाध्यक्ष अष्टलक्ष्मी शाक्यले भनिन्, ‘आज पनि दिउँसो २ बजेपछि हामी बस्छौं। समसामयिक मुलुकको अवस्था, पार्टीको सांगठनिक जीवनबारे छलफल गर्छौं।’
एमालेले ३० गते सचिवालय बैठक बोलाएको छ। बैठकको कार्यसूची तय गर्न पनि यसले सघाउ पुर्याउने शाक्यले बताइन्।
‘अध्यक्षले सुरूआत गर्नु भएको छ। छलफलले सामुहिकताको भावना जगाउँछ। पार्टीका योजना तय गर्न पनि सजिलो हुन्छ,’ उनले भनिन्।
पार्टीमा सम्वाद, छलफल कमजोर बन्दै गएको गुनासो बढेपछि अध्यक्षले उपाध्यक्षसँग पनि छलफल थालेको एक नेताले बताए।
‘उपाध्यक्षहरूलेसमेत बोल्न नपाएको गुनासो आएपछि अध्यक्षले छलफल थाल्नु भएको हो,’ ती नेताले भने, ‘कुराकानी त पहिले पनि हुन्थ्यो। तर, एजेन्डामा आधारित भएर छलफल गर्ने अवस्था नबनेको गुनासो बढेपछि अध्यक्षले सुरूआत गर्नुभएको हो।’
यसपटक एमालेले विभागहरूको संयोजनको जिम्मा उपाध्यक्षहरूलाई दिएको छ।
साझा कार्यक्षेत्र पहिल्याउन र तिनका नीतिहरूमा सामञ्जस्यता ल्याउन परामर्श गर्ने जिम्मा उपाध्यक्षहरूलाई दिएको एमालेले बताएको छ।
त्यस्तै आफ्नो कार्यक्षेत्रभित्र पर्ने विषयमा नीतिगत अवधारणा तयार गर्न बाँकी विभागलाई नीति निर्माणमा सहजीकरण गर्ने कार्यादेश पनि उपाध्यक्षहरूलाई छ।
आफ्नो कार्यक्षेत्रभित्र पर्ने विषयमा आवश्यकताअनुसार सरकारको ध्यानाकर्षण गराउने, दबाब सिर्जना गर्न सहजीकरण र समन्वय गर्ने र सम्बन्धित विभागसँग सम्बन्धित विषयमा पार्टी अध्यक्ष र केन्द्रीय कमिटीलाई आवश्यक सुझाव दिने काम पनि उपाध्यक्षहरूको छ।
यही कामहरूको जानकारी दिन पनि अध्यक्षले छलफल गरेको उपाध्यक्ष सुवास नेम्वाङले जानकारी दिए।
‘यसअघि उपाध्यक्षहरूको परिभाषित काम हुँदैनथ्यो। अध्यक्षलाई सहयोग गर्ने भन्ने हुन्थ्यो। अहिले विभागको संयोजनको जिम्मा दिइएको छ। त्यसको कार्यप्रगति जानकारी गराउन नियमित बैठक बस्ने भन्ने छ,’ नेम्वाङले भने।
एमालेले नीति तथा योजनाको संयोजनको जिम्मा ईश्वर पोखरेललाई दिएको छ। पूर्वाधार निर्माण र विकाससम्बन्धी विभागहरूको कामको संयोजन सुरेन्द्र पाण्डेले गरिरहेका छन्।कृषि तथा उद्यमशीलताअन्तर्गतका विभागको संयोजन रामबहादुर थापा ‘बादल’ले, सामाजिक विकाससँग सम्बन्धित विभागको संयोजन अष्टलक्ष्मी शाक्य र मानव स्रोतसँग सम्बन्धित विभागहरूको संयोजनको जिम्मा युवराज ज्ञवालीले पाएका छन्।
सुशासन र सेवा प्रवाह सुवास नेम्वाङ र पार्टी सम्बद्ध विभागहरूको संयोजन विष्णु पौडेलले गर्नेगरी निर्णय भएको थियो।
