एकीकृत समाजवादीको जारी सचिवालय बैठकमा गठबन्धनको संस्कृतिअनुरूप घटक दलहरू परिचालित नहुँदा अपेक्षाकृत सफलता प्राप्त हुन नसकेको कुरा उठेको छ।
नेपाली कांग्रेस, माओवादी केन्द्रले सबै सिट आफैँलाई चाहिन्छजस्तो व्यवहार प्रदर्शन गर्दा र गठबन्धनको संस्कृतिअनुरूप कार्यकर्ता परिचालन गर्न नसक्दा एकीकृत समाजवादी राष्ट्रिय दलसमेत बन्न नसकेको धारणा सदस्यहरूले राखेका हुन्।
शुक्रबार उपाध्यक्ष राजेन्द्र पाण्डेसहित ७ जना नेताले बोलेका थिए।
‘पार्टी गठनको २२ महिना भयो। यो बीचमा हामी आधारभूत तहसम्म त पुगेका छौं। तर, निर्वाचनमा ठेस लाग्यो। निर्वाचनमा गठबन्धन गरेरै जाँदा पनि अपेक्षित उपलब्धी भएन,’ पाण्डेले सेतोपाटीसँग भने, ‘जहाँजहाँ गठबन्धन हुन्थ्यो, त्यहाँ गठबन्धनलाई सघाउने, नभएका ठाउँमा, हुन नसकेका ठाउँमा हामीले उम्मेदवार उठाउन सकेको भए मत बढ्थ्यो भनेर मैले धारणा राखेँ।’
उनको त्यो धारणामा हिजो बोलेका अरू ६ जना सदस्यहरूको पनि मतक्य रहेको पाण्डेले बताए।
उनले पार्टीमा ४० प्रतिशत युवा, ४० प्रतिशत महिला र १० प्रतिशत दलितलाई स्थान दिनुपर्ने धारणा राखेको बताए।
महाधिवेशन मंसिर कि चैत?
जारी सचिवालय बैठकमा महाधिवेशनबारे पनि छलफल भएको पाण्डेले बताए।
‘केही साथीहरूले मंसिरमै महाधिवेशन गर्नुपर्छ भनेर पनि कुरा राख्नुभएको छ। केहीले मंसिरमै भ्याइँदैन, चैतमा गर्नुपर्छ भनेर पनि कुरा राख्नु भएको छ। हामी त्यसबारे पनि निष्कर्षमा पुग्छौं,’ उनले भने।
सचिवालय बैठकमा संगठन सुदृढीकरणको विशेष अभियानको सामान्य जानकारी, वर्तमान र हाम्रा कार्यभार, सबैबाट विचारहरूको प्रस्तुती, आगामी कामको विस्तृत योजना, कार्यविभाजन, कमिटीमा समायोजन तथा थपघट, जनसंगठन युवा र विद्यार्थी, विभागहरूको कामको व्यवस्थापनलगायत एजेन्डामा आधारित भएर छलफल भइरहेको उनले बताए।
राजेन्द्र पाण्डे, बेदुराम भुसाल, प्रमेश हमाल, घनेन्द्र बस्नेत, केशवलाल श्रेष्ठ, जयन्ती राई, रामचन्द्र झाले आफ्नो धारणा राखेका थिए।
1656154053.jpg)
