नेपाली कांग्रेसका सांसद राजेन्द्र बजगाईंले राष्ट्रिय स्वतन्त्र पार्टी (रास्वपा) की सांसद सुमना श्रेष्ठको अभिव्यक्ति संसदको रेकर्डबाट हटाउन माग गरेका छन्।
प्रतिनिधि सभाको आइतबारको बैठकमा सभामुख देवराज घिमिरेसँग समय लिई बोलेका बजगाईले ‘सांसद सुमना श्रेष्ठले बहुमतका आधारमा पास गर्ने भए, गुण्डा शैलीमा पास गर्ने भए भन्ने अभिव्यक्ति दिनुभएको र यो संसदीय मर्यादाभित्रको भाषा नभएकोले तत्काल हटाउन माग गर्दछु’ भनेका थिए।
लगत्तै सभामुख घिमिरेले उक्त विषय ध्यानाकर्षण भएको बताए। ‘हामी यसलाई हेरेर अभिव्यक्ति के आएको छ, निर्णय गर्नेछौं,’ उनले भने।
सांसद श्रेष्ठले बहुमतका आधारमा अपराधि र गुण्डा संरक्षण गर्ने विधेयक सरकारले ल्याएको अभिव्यक्ति दिएकोले अमर्यादित भाषा हटाउन माग गरिएको उनले बताए।
प्रतिनिधि सभामा आइतबार केही नेपाल ऐन संशोधन विधेयकमाथि छलफलको कार्यसूची थियो। अदालतमा विचाराधीन रहेको मुद्दा फिर्ता गर्न सक्ने गरि विधेयकको एउटा प्रावधानलाई लिएर रास्वपा र राप्रपाले विरोध गरेका थिए।
रास्वपाकी सांसद सुमना श्रेष्ठ र सोविता गौतम तथा राप्रपाका सांसद ज्ञानेन्द्र शाही, नेमकिपाका सांसद प्रेम सुवालले विरोधको सूचना राखेका थिए।
भिडिओ:
