नेपाली कांग्रेसका केन्द्रीय सदस्य राजिवविक्रम शाहले आफू गुटको सिकार भएको बताएका छन्।
बिहीबारको केन्द्रीय समितिमा धारणा राख्दै उनले पार्टी पदाधिकारीहरू नै गुट बनाउने गरेको र त्यसको प्रत्यक्ष सिकार जनता र कार्यकर्ता सँगसँगै रहने आफूसमेत भएको गुनासो पोखे।
‘पदाधिकारी नै गुट बनाउँछन्, यसको सिकार हामीजस्ता परिरहेका छौं। सभापतिज्यू, म प्रत्यक्ष सिकार भएँ,’ उनले भने।
आफू प्रतिनिधित्व गर्ने जिल्ला जाजरकोटमा सहमतिकै आधारमा नेतृत्वसहित प्रतिनिधि चयन गरिएको बताए। ‘घरभित्र देखिएका विवाद त्यहीँ मिलाउन हामी सफल भयौं। जाजरकोटमा जस्तै अन्यत्र पनि यस्तै भइरहेको भए गुटको सिकास हुनुपर्थ्यो?,’ उनले प्रश्न गरे।
कम्युनिष्टहरूको आधार क्षेत्रबाट आफू २ पटक निर्वाचित भए पनि गुटको सिकार भइरहनुपरेको गुनासो उनको छ।
‘महाधिवेशनमा लोकप्रिय मतका साथ केन्द्रीय सदस्य भए। कर्णाली प्रदेश सभामा संसदीय दल नेताको आकांक्षा राखेको थिएँ तर दिएनन्,’ उनले भने, ‘किन? नेताहरूले छलफलमा बोलाउँछन् कि भन्ने थियो।’
संसदीय दलमा प्रतिस्पर्धा गर्ने चाहना राख्दा गुट तथा उपगुटको सिकार हुनुपरेको उनले बताए।
‘हामीले कस्तो लोकतान्त्रिक चरित्र देखाएका छौं?,’ उनले भने, ‘संसदीय दल नेता लड्छु भन्दा मैले नेताहरूबाट कस्तो व्यवहार पाएँ? कहिलेसम्म गुटको सिकार हुने? जिम्मेवार नेताको व्यवहार हामीले कहिलेसम्म सहने?’
