नेपाली कांग्रेसका केन्द्रीय सदस्य मधु आचार्यले कांग्रेस रूपान्तरण एजेन्डा केन्द्रीय समितिमा प्रवेश गराएका छन्।
बिहीबारको केन्द्रीय समितिमा धारणा राख्दै आचार्यले पार्टीले कुनै गतिविधि नगर्दा आफूहरूले कांग्रेस रूपान्तरण अभियान गर्दै सातै प्रदेश भेला गरेको बताएका हुन्।
‘१४ औं महाधिवेशनमा नारा थियो- एकता, उत्साह र रूपान्तरण। यसबीचमा उत्साहमा कमी आएको देखिएपछि र केन्द्रीय समिति तथा कुनै कार्यक्रम पनि नआएका बेला त्यसै किन बस्ने भनेर हामीले सातै प्रदेशमा गएर भेला गर्यौं।’
उनले रूपान्तरण अभियानबारे नेता/कार्यकर्तासँग छलफल गरिएको बताए।
‘समस्याका विषयमा धारणा बुझेको र टिपोर्ट गरेर पार्टीमा बुझाइएको छ,’ उनले भने, ‘गहन सुझाव छन्, मनन गर्न आग्रह छ।’ आचार्यसहित नेताहरूले नेतृत्वको कार्यशैली सुधार गर्न गत जेठ महिनामा रूपान्तरण अभियान गरेका थिए।
उनले भ्रष्टाचारमुक्त कांग्रेस बनाउन अभियान गर्नुपर्ने पनि बताए।
‘बहुचर्चित काण्डको छानबिन गर्न सरकारलाई कांग्रेसले दबाब दिनुपर्छ। आवश्यक परे सडकमा उत्रिनुपर्छ,’ उनले भने, ‘दोषी देखिए कारबाहीका लागि दबाब दिनुपर्छ। व्यक्ति होइन एजेन्डा हेर्छ पार्टीले भन्ने स्थापित गर्नुपर्छ। परम्पराका नाममा अल्झिन हुन्न।’
भ्रष्टाचारमा जोडिएकालाई स्वत: निलम्बन गर्ने नीतिगत व्यवस्था गर्न पनि उनले माग गरेका छन्।
उनले दुई महिनाभन्दा ढिलो गरी आउने कार्यसम्पादनका एजेन्डा केन्द्रीय कार्यसमितिले अनुमोदन गर्न नहुने बताए।
