नेपाली कांग्रेसका केन्द्रीय सदस्य सञ्जयकुमार गौतमले यसपालि धेरैले कांग्रेस क्रियाशील सदस्यता नवीकरण नगरेको बताएका छन्।
बिहीबार केन्द्रीय समिति बैठकमा धारणा राख्दै उनले क्रियाशील सदस्यता नवीकरणमा रूची नदेखाएको पाइएको बताए।
‘क्रियाशील सदस्यता अनलाइनबाट भर्ने के के गर्ने बढो क्रान्तिकारीजस्तो देखिन्छ,’ उनले भने, ‘धेरैले यसपालि क्रियाशील सदस्यता नवीकरण गरिरहेका छैनन्। नवीकरण गर्न उनीहरूको इच्छा छैन।’
उनले मापदण्ड तोकेर मात्र क्रियाशील सदस्यता दिइनुपर्ने बताए।
फरक प्रसंगमा उनले प्रदेश र केन्द्रमा सरकार भए पनि पार्टीसँग समन्वय नै नभएको बताए।
‘मन्त्रीहरूले केन्द्रीय सदस्य, जिल्ला सभापतिहरूसँग कुनै सल्लाह नै गर्नुहुन्न,’ उनले भने, ‘जो मन्त्री भयो ऊ ठूलो भयो। उसको मात्र बुद्धि छ, अरू बाँकी झारपात हुन्?’
