नेकपा (एमाले)निकट पत्रकारहरूको संस्था प्रेस चौतारी, नेपालका अध्यक्ष गणेश बस्नेतविरूद्ध नेपाल प्रहरीको साइबर ब्युरोमा उजुरी परेको छ।
उपप्रधानमन्त्री एवम् गृहमन्त्री नारायणकाजी श्रेष्ठले ‘सुन पास गराएको’ भन्दै फेसबुकमार्फत् भ्रामक प्रचार गरेकाले बस्नेतविरूद्ध उजुरी गरेको श्रेष्ठको सचिवालयले जानकारी दिएको छ।
त्यस्तै, मंगलबार बरामद गरिएको सुनलाई जोडेर भ्रामक समाचार प्रकाशित गरेको भन्दै जनबोली डटकम (अनलाइन)विरूद्ध पनि उजुरी परेको छ। उपप्रधानमन्त्री एवम् गृहमन्त्री श्रेष्ठका प्रेस सल्लाहकार कमल गिरीले बस्नेतविरूद्ध प्रहरीको साइबर ब्युरो र जनबोली डटकमविरूद्ध प्रेस काउन्सिलमा आजै उजुरी दिएका हुन्।
अध्यक्ष बस्नेतले बिहीबार फेसबुक स्ट्याटसमार्फत् भ्रामक सूचना सम्प्रेषण गरेको उजुरीमा उल्लेख छ। बस्नेतले फेसबुक स्ट्याटसमार्फत् नारायणकाजी श्रेष्ठमाथि ‘सुन पास गराएको’ आरोप लगाएका थिए।
‘मलाई आएको सूचना यस्तो छ, ‘गृहमन्त्रीले पास गराएको सुन अर्थमन्त्रीले समाते।’ मैले सोधें– कसरी? जवाफ आयो खोज्नोस्, सत्य यही हो।’ अब कसरी पत्याउनु? नारायणकाजी कमरेड जस्तो त्यागी, एक रुपैयाँ आम्दानी नभए पनि दैनिक ५० हजार खर्च गरेर हिँड्न सक्ने त्यागी गृहमन्त्री भएको बेला यस्तो होला भनेर,’ उनले फेसबुकमा लेखेका थिए।
यसबाट गृहमन्त्रीको निष्ठा र आचरणमाथि अतिरञ्जित भ्रम सिर्जना गर्न खोजिएको उनको सचिवालयको ठहर छ।
‘यसले गृहमन्त्री श्रेष्ठको व्यक्तिगत निष्ठा, आचरण र नैतिकतामाथि सामाजिक सञ्जालमा अतिरञ्जित भ्रम सिर्जना गरेको, सुशासन तथा गुणात्मक प्रशासनिक सुधारमा अनवरत लागेको गृह प्रशासन नेतृत्वलाई हिलो छ्याप्ने काम गरेको र गृहमन्त्रीले अगाडि बढाएका कामलाई अवरूद्ध गर्ने नियत बोकेको देखिन्छ,’ उजुरीमा उल्लेख छ।
जनबोली न्यूज नेटवर्क प्रालिको अनलाइन मिडियाले समेत उपप्रधान एवम् गृहमन्त्री नारायणकाजी श्रेष्ठविरूद्ध आपराधिक मनोवृत्ति राखेर भ्रमपूर्ण समाचार सार्वजनिक गरेको दाबी गरेको छ।
‘उक्त मिडियाका जिम्मेवारहरूलाई यस्तो झूटो र भ्रमपूर्ण समाचार छापेको कसुरमा तत्काल कानुनको दायरामा ल्याइ आवश्यक कारबाही गर्न प्रेस काउन्सिलमा उजुरी दिएका थियौं,’ सल्लाहकार गिरीले भने, ‘आजै पत्र काटी उक्त मिडियालाई काउन्सिलमा उपस्थित भएर समाचार प्रमाणित गर्न अथवा माफीसहित समाचार हटाउन २४ घण्टाको अल्टिमेटम दिएको छ।’
अध्यक्ष बस्नेतले भने स्ट्याटसलाई साइबर क्राइम प्रमाणित गर्न चुनौती दिएका छन्।
‘भर्खरै गृहमन्त्रीका प्रेस हेर्ने मित्र कमल गिरीले नेपाल प्रहरीको साइबर ब्युरोमा उजुरी दिएर आएँ भन्दै तपाईंले स्ट्याटस सच्याउनुस भन्नुभयो,’ उनले भने, ‘मैले भनें साइबर क्राइम लगाउने विषय के हो मलाई पनि थाह छ।’
उनले गृहमन्त्रीको सचिवालयबाट प्रहरीमा उजुरी गरें भन्नु नै पदको चरम दुरूपयोग भएको बताएका छन्।
‘आतङ्क मच्चाएर, विरोधी सबैको मुख बन्द गराएर आफूले गरेको सबै गल्ती ढाकछोप पार्ने र सत्यलाई घाँटी निमोठेर मार्ने योजना नै हो। दिनभर सचिवालयका सदस्य खटाएर मलाई पक्राउ गर्यो भनेर समाचार लेखाउने काम भयो। समाचार लेख्नेहरू अहिले गृहमन्त्रीको सचिवालयबाट गलत सूचना दिए भन्दै हटाइरहेका छन्।’
