नेपाली कांग्रेसकी केन्द्रीय सदस्य सरिता प्रसाईंले विश्वविद्यालयका पदाधिकारी र राजदूत नियुक्तिमा राजनीतिकरण नगर्न आग्रह गरेकी छन्।
शुक्रबारको केन्द्रीय समिति बैठकमा धारणा राख्दै उनले राजदूत नियुक्त गर्दा पार्टीमा लागेका मानिसलाई गर्न नहुने बताइन्।
‘विश्वविद्यालयका पदाधिकारी नियुक्त गर्दा र राजदूत नियुक्त गर्दा राजनीतिकरण नगरियोस्,’ उनले भनिन्, ‘शिक्षा क्षेत्रमा राजनीति गर्न हुन्न। शिक्षा क्षेत्र अस्तव्यस्त भएको छ। राजदूत पार्टीका कार्यकर्ता बनाउँदा छवि बिग्रेको छ।’
उनले योग्य र क्षमतावान व्यक्तिलाई राजदूत नियुक्त गर्न माग गरिन्।
प्रसाईले केन्द्रीय समिति लाइभ भएको भन्दै अर्कोपटकदेखि लाइभ नगर्न आग्रह गरिन्।
‘मनका कुरा राख्न पाइएन, सभापतिज्यू अर्कोपटकदेखि बैठक लाइभ नगरियोस्,’ उनले भनिन्।
महामन्त्री गगन थापाले ल्याएको वार्षिक कार्यतालिका राम्रो रहेको उनको भनाइ थियो।
