नेपाली कांग्रेसका केन्द्रीय सदस्य गोपालमान श्रेष्ठले बालकृष्ण खाणलाई पुर्पक्षका लागि कारागार पठाउनुअघि किन रोक्न सकिएन भन्ने प्रश्न गरेका छन्।
शुक्रबारको केन्द्रीय समिति बैठकमा खाणको नाम नलिई श्रेष्ठले एउटा साथी पुर्पक्षमा कारागारमा छ भनेका थिए।
नक्कली भुटानी शरणार्थी प्रकरणका अभियुक्त खाणलाई निलम्बन गर्ने कि नगर्नेमा केन्द्रीय समितिमा केन्द्रीय सदस्यहरूले धारणा राखिरहेका छन्।
‘एउटा साथी पुर्पक्षमा थुनिएको छ। त्यहाँ पुग्नबाट उसलाई रोक्न सकिन्थ्यो किन रोकिएन,’ उनले भने, ‘त्यो साथीलाई किन रोक्न सकिएन।’
उनले अदालतमा यसबारे मुद्दा रहेको तर गल्ती गरेको प्रमाणित भइनसकेको पनि बताए। ‘पुर्पक्षमा जसलाई पनि राख्न पाउँछ। दोषी ठान्न भएन,’ उनले भने, ‘उहाँका बारेमा यसरी छलफल नगरौं। हाम्रो परिवारको एक सदस्य कारागारमा छन्।’
उनले खाण निर्दोष भएर आउन सक्ने बताए।
साथै पार्टीभित्र एकले अर्काविरूद्ध वाकयुद्ध गर्न नहुने बताए।
