नेपाली कांग्रेसका केन्द्रीय सदस्य बलबहादुर केसीले अहिलेको केन्द्रीय समिति बैठकले सभापति र महामन्त्रीहरूबीच द्वन्द्व बढाउने काम गरेको टिप्पणी गरेका छन्।
शुक्रबारको केन्द्रीय समिति बैठकमा बोल्दै उनले केन्द्रीय सदस्यहरू सभापति र महामन्त्रीका पक्षमा उभिएर धारणा राख्दा द्वन्द्व बढाउने काम भएको बताए।
‘महाधिवेशनमा जुन समूहबाट लडे पनि निर्वाचित भएपछि शेरबहादुर देउवा सबैको सभापति हो,’ उनले भने, ‘महामन्त्री एउटा र सभापति अर्को क्याम्पमा जस्तो गरी केन्द्रीय समितिमा बहस भइरहेका छन्।’
यसरी बैठकमा धारणा आइरहेकोले यसले सन्देश राम्रो नगएको उनले बताए।
‘कसले के बोले छाड्नुस्, यो बैठकले सभापति र महामन्त्रीको द्वन्द्व बढाउने काम भयो,’ उनले भने।
पार्टी संगठनको अवस्था कसैलाई पनि चित्तबुझ्दो नभएको उनले बताए।
