नेपाली कांग्रेसका सहमहामन्त्री महेन्द्र यादवले कांग्रेसलाई सबैभन्दा ठूलो पार्टी बनाएकोमा सभापति शेरबहादुर देउवाको प्रशंसा गरेका छन्।
आइतबारको केन्द्रीय समिति बैठकमा धारणा राख्दै यादवले सभापति देउवाले पार्टीलाई ठूलो बनाएरै छाड्छु भन्ने प्रतिबद्धता गर्ने गरेको र गएको चुनावबाट पार्टीलाई ठूलो बनाएको बताए।
‘स्थानीय, प्रदेश र केन्द्रमा कांग्रेसलाई सबैभन्दा ठूलो पार्टी बनाउनुभयो, त्यसका लागि सभापतिज्यूलाई धेरैधेरै धन्यवाद छ,’ उनले भने, ‘गुमेको सरकार फिर्ता ल्याउनुभयो, गठबन्धन कायम गर्नुभयो त्यसका लागि पनि धन्यवाद छ।’
सभापतिले गल्ती गर्ने गरेको भन्दै आलोचना हुने गरेको प्रसंग निकालेका सहमहामन्त्री यादवले भने, ‘ठूलो पार्टी बनाउनु गल्ती हो भने, फेरि एकचोटी गल्ती गर्नुहोला सभापतिजी। पूर्ण बहुमतको कांग्रेस सरकार बनाउनुहोला। सारा जनताले बधाई दिनेछन्।’
उनले केन्द्रीय समितिलाई बाहिर राखेर जिल्ला सभापति भेला गरिएकोमा असन्तुष्टि जनाएका थिए। महामन्त्रीद्वय गगन थापा र विश्वप्रकाश शर्माले केन्द्रीय कार्यालयकै तर्फबाट केही समयअघि जिल्ला सभापति भेला गरेका थिए।
