नेपाली कांग्रेसका केन्द्रीय सदस्य श्याम घिमिरेले नेताहरूको आन्तरिक कलहले पार्टीलाई नोक्सान भइरहेको बताएका छन्।
आइतबारको केन्द्रीय समितिमा धारणा राख्दै उनले यसबारे सचेत रहन नेतृत्वलाई आग्रह गरेका थिए।
'स्थापनाकालदेखि आजसम्म आन्तरिक कलह सुसुप्त त कहिले सक्रिय रुपमा प्रस्तुत भएको छ। जब पार्टीभित्र अन्तरकलह चुलिन्छ, नोक्सान पार्टीलाई मात्र नभएर प्रजातन्त्र र मुलुकले समेत ठूलो क्षति व्यहोर्नु परेको छ,' उनले भने, 'कम्तीमा अब समहालिन पर्छ। पार्टी भित्रको सम्रग एकता आजको आवश्यकता हो।'
नेताहरु एक अर्कालाई खुइल्याउन मै व्यस्त र मस्त रहेको उनले बताए।
केन्द्रीय नेताहरुको यो प्रवृतिको प्रभाव भ्रातृ संस्थासम्म पुगेको उनको भनाइ छ। ‘एउटाले टिकट पाएपछि अर्को पक्ष न्वारनदेखिको बल लगाएर हराउन लाग्ने प्रवृत्ति हाबी भएको छ,’ उनले भने।
उनले पार्टीलाई विधि र विधानसम्मत चलाउन आग्रह गरेका छन्।
महामन्त्रीहरूले ल्याएको कार्ययोजना राम्रो भएको उनको भनाइ छ।
