परराष्ट्रमन्त्री एनपी साउदले मन्त्रालयअन्तर्गतको कन्सुलर सेवा विभागलाई प्रहरी चारित्रिक प्रमाणपत्र (पिसिसी) का सम्पूर्ण कामहरू अनलाइनमार्फत् गर्न निर्देशन दिएका छन्।
मन्त्री साउदले विभागका महानिर्देशक प्रकाशमणि पौडेललाई १० दिनभित्रै प्रहरी चारित्रिक प्रमाणपत्रका सम्पूर्ण कामहरू अनलाइनमार्फत् गरिने व्यवस्था मिलाउन निर्देशन दिएका हुन्।
अहिले प्रहरी चारित्रिक प्रमाणपत्रका अन्य कामहरू अनलाइनमार्फत् हुने भए पनि कन्सुलर विभागको छाप र प्रमाणीकरण गर्ने अधिकारीको हस्ताक्षरसहितको पत्र बुझ्न सेवाग्राही स्वयं अथवा इच्छाएको व्यक्ति उपस्थित हुनै पर्ने व्यवस्था छ।
जसले गर्दा राहदानी विभागमा सेवाग्राहीको भीड लाग्ने र समयमै सेवा नपाउने भएकाले सो न्यूनीकरणका लागि अनलाईनमार्फत् सेवा पाउने व्यवस्था गर्नुपर्ने मन्त्री साउदको भनाइ छ।
कन्सुलर सेवालाई सरल, सहज, पारदर्शी र उत्तरदायी ढंगले सम्पादन गर्न सुशासन (व्यवस्थापन तथा सञ्चालन) ऐन, २०६४ को दफा ९ ले दिएको अधिकार प्रयोग गरी सरकारको २०७० वैशाख २० गतेको निर्णयअनुसार परराष्ट्र मन्त्रालयअन्तर्गत कन्सुलर सेवा विभागको स्थापना भएको हो।
कन्सुलर सेवा विभागका महानिर्देशन पौडेलले अनलाइनमार्फत् कामहरू अघि बढाउनका लागि टिप्पणी उठाउने काम भइसकेको र मन्त्रीबाट स्वीकृत गराएर दुई साताभित्रै लागु गरिने बताएका छन्
‘पिसिसीका कामहरू अनलाइनमार्फत् नै हुँदै आएका थिए। अन्तिममा मात्रै हामीले बोलाएपछि सेवाग्राही आउनु पर्ने हुन्थ्यो। अब त्यो हट्छ,’ उनले भने,’ ‘अब थोरै कामहरू गर्नुपर्ने छ। टिप्पणी उठाउने काम भइसकेको छ।ֹ’
