नेपाली कांग्रेसका उपसभापति पूर्णबहादुर खड्काले पार्टीका महामन्त्रीहरू नबोलाएका बेला पनि सभापतिकहाँ जानुपर्ने बताएका छन्।
महामन्त्रीहरूले बोलाएका बेला सभापतिकहाँ जाने गरेको बताएको उल्लेख गर्दै खड्काले नबोलाएका बेला पनि जानुपर्ने बताए।
‘महामन्त्रीजीहरूले बोल्ने बेला भन्नुभयो- सभापतिले बोलाएका बेलामा हामी जाने गरेका छौं। मेरो यसमा थप सुझाव छ- बोलाएका बेला मात्र होइन कि महामन्त्रीको जिम्मेवारी र पद सभापति र संस्थाको लागि कार्यकारी सल्लाहकार पद पनि हो,’ सोमबारको केन्द्रीय समितिमा धारणा राख्दै खड्काले भने।
सभापति र महामन्त्रीका बीचमा संवाद बाक्लो भए राम्रो हुने पनि उनले बताए।
उनले टिकट बाँड्दा भएका कमजोरीको जिम्मेवारी लिने पनि बताए। ‘विधिअनुसार टिकट वितरण गरिएको छ, तैपनि कुनै कमजोरी भएको भए म संसदीय समिति सदस्य भएकोले जिम्मेवारी लिन्छु,’ उनले भने।
सरोकार राख्नेहरूसँग छलफल गरेर नै टिकट वितरण गरेकोले नैतिक जिम्मेवारी लिने उनले बताए। उनले कर्णाली प्रदेशमा टिकट वितरणमा केही कमजोरी देखिएको स्वीकार गरेका थिए। ‘दोहोरो मापदण्डका कारण त्यहाँ केही अन्याय भएको छ,’ उनले भने।
उनले पार्टीमा विधान कार्यान्वयनको बाटोमा लाग्दा बिबाद कम हुने पनि बताए। ‘फरक मत छन् भने पनि पार्टीमा राख्ने ठाउँ छ,’ उनले भने, ‘पार्टीभित्र संस्कार र संस्कृतिमा स्खलन आएको छ भन्ने कुरा म स्वीकार्छु।’
साथै खड्काले सभापति देउवाले अब महाधिवेशनमा सभापति नउठ्ने बताइसकेको उल्लेख गरेका छन्। ‘म सभापति उठ्दिनँ, को को तयारी गर्ने हो गर्नुस् भन्नुभएको छ,' उनले भने।
