नेपाली कांग्रेसले संगठन सुदृढीकरण गर्न राष्ट्रव्यापी अभियान सञ्चालन गर्ने भएको छ।
भदौ १० गतेदेखि २४ गतेसम्म देशैभर संगठन सुदृढीकरण अभियान चलाउने बिहीबारको केन्द्रीय समितिले निर्णय गरेको हो।
महामन्त्री विश्वप्रकाश शर्माका अनुसार ‘सांगठनिक सुदृढीकरणका लागि भदौ १० देखि २४ समुदायमा कांग्रेस ‘राष्ट्रव्यापी अभियान’ सञ्चालन' गर्ने निर्णय भएको छ।
त्यसका लागि साउन २० देखि ३० गतेसम्म आन्तरिक तयारी हुनेछ। कांग्रेसले २०८० सालमा ५ देखि ७ लाख सदस्य पार्टीमा थप गर्ने लक्ष्यसमेत राखेको छ।
कांग्रेसले मंसिर १३ गतेदेखि १५ गतेसम्म महासमिति बैठक बोलाउने निर्णय पनि गरेको छ।
साथै कांग्रेसले संघीय निजामति सेवा ऐन, संघीय प्रहरी ऐन, संघीय शिक्षा ऐन जस्ता अति आवश्यक ऐनबारे सरोकारवालासँग वृहत छलफल र परामर्श गरेर यथाशीघ्र विधेयक संसदमा ल्याई पारित गर्नसमेत सरकारसँग माग गरेको छ।
साथै तराई मधेसमा यस वर्ष न्यून वर्षाका कारण समयमा खेती गर्ने अवस्था नरहेकोले सुख्खा क्षेत्र घोषणा गरी किसानलाई उचित राहत दिन र दीर्घकालिन समाधान खोज्न कांग्रेसले सरकारको ध्यानाकर्षणसमेत गराएको छ।
