नेकपा एमालेका अध्यक्ष केपी शर्मा ओलीले पुष्पकमल दाहाल प्रचण्ड एमालेको रकममा चलेको आरोप लगाएका छन्।
नेकपा माओवादी केन्द्र र नेकपा एमालेबीच एकता भएको भनिए पनि वास्तवमा त्यो एकता नै नभएको उनको जिकीर थियो।
एमाले र माओवादी मिलेर नेपाल कम्युनिष्ट पार्टी बनेको थियो।
त्यसबेलाको प्रसंग निकाल्दै एमाले अध्यक्ष ओलीले प्रचण्डले हिसाबसमेत नबुझाएको र आफ्ना गतिविधि सञ्चालन गरिरहेको उल्लेख गरेका छन्।
शुक्रबार भएको जनसंगठन समन्वय संयन्त्रको १२ औं बैठकमा बोल्दै ओलीले भने, ‘माओवादीसँग एकता भनिए पनि एकता हुँदै भएन। कतिवटा संगठन एकता भएन, भए पनि तेल एकातिर, पानी एकातिर। घुल्न नै पाएन।’
नेकपाकालमा आफूहरूले एउटा पनि छुट्टै भेला वा बैठक नगरेको ओलीको दाबी थियो।
‘हामीले कहिल्यै पनि छुट्टै भेला वा बैठक गरेनौं, प्रचण्डले आफ्नो पार्टी जीवितै राखे। बैठक अलगै गरिरहे। कार्यालय जीवितै राखे,’ ओलीले भने, ‘आफ्नो हिसाबकिताब बुझाएनन्। रकम कहिल्यै बुझाएनन्। एमालेको रकम लिए। एमालेको रकममा चले। एमालेको रकम खाए। एमालेको रकम पिए। सबै गरे।’
प्रचण्डले त्यसबेला पार्टीमा एक पैसा पनि दाखिल नगरेको ओलीको आरोप छ।
‘हिसाब पनि दाखिल गरेनन्। केही पनि दाखिल गरेनन्। कार्यालय पनि दाखिल गरेनन्। बैंकमा भएको डिपोजिट पनि दाखिल गरेनन्। आफ्नो बनाएर राखिरहे। किनभने उनलाई पार्टी कब्जा गर्न र यसलाई उद्देश्यबाट समाप्न पार्न सकिएन भने अलग हुनुपर्छ भन्ने थियो,’ ओलीले भने।
फरक प्रसंगमा ओलीले भ्रष्टाचारका विरूद्ध कांग्रेस बोल्नै नसक्ने बताए। ‘के भएको कांग्रेसलाई। हेर्दाहेर्दै हेर्नुस् त कांग्रेस, भ्रष्टाचारबारे बोल्नै सक्दैन,’ उनले भने।
