निर्माण व्यवसायीहरूले प्रधानमन्त्रीको सरकारी निवास बालुवाटार अगाडि प्रदर्शन गरेका छन्।
उनीहरूले मंगलबार बालुवाटारस्थित सडकमा डोजर तेर्साएर प्रदर्शन गरेका हुन्।
निर्माण व्यवसायी महासंघका अध्यक्ष रवि सिंहले निर्माण उद्योगमा भएका समस्यालाई सरकारले छिटो सम्बोधन गर्नुपर्ने बताए।
निर्माण व्यवसायीलाई काममा फर्काउन प्रधानमन्त्री पुष्पकमल दाहाल प्रचण्डले ठोस कार्ययोजनासमेत ल्याउनुपर्ने उनको भनाइ छ।
‘सम्झौताहरू कार्यान्वयनमा नआएसम्म र सबै ठेक्काको एकमुष्ट म्याद थप नभएसम्म आन्दोलन जारी रहन्छ,’ अध्यक्ष सिंहले भने, ‘आज आन्दोलनको तेस्रो दिन हो।’
उनीहरूले मंगलबार बिहान ९ बजेदेखि १० बजेसम्म प्रदर्शन गरेका हुन्। उनले प्रधानमन्त्री निवास घेराउ गरिएको बताए।
‘नेपाल सरकारले बनाएका योजनाहरूमा ४ खर्बभन्दा बढी योजनाको सुनिश्चितता गरेको छ तर स्रोत नभएको त्यस्तो योजनाको लागि सरकारले एक वर्ष म्याद थप गर्दैछ, त्यसको भुक्तानीको व्यवस्थापन कसरी गर्छ,’ उनले प्रश्न गरे, ‘भुक्तानी गर्न नसके त्यस्ता योजना खारेज गर्नुपर्छ।’
मूल्य समायोजनसहितका ९ बुँदे मागसहित आफूहरूले आन्दोलन गरेको उनले बताए।
(न्युज एजेन्सी नेपाल)
