लम्पी स्किन रोगबाट २८ हजारभन्दा बढी पशुचौपाया मरेको र सरकार उदासीन बनेको भन्दै राष्ट्रिय स्वतन्त्र पार्टीले संसद् सचिवालयमा जरूरी सार्वजनिक महत्त्वको प्रस्ताव दर्ता गरेको छ।
लम्पी स्किनबाट अहिलेसम्म के कति क्षति भएको र निवारणका लागि सरकारले कस्तो पहल लिइरहेको छ भनेर यथार्थ जानकारीको माग गर्दै प्रस्ताव दर्ता गरेका रास्वपाका सचेत निशा डाँगीले बताइन्।
रास्वपाका ७ जना सांसदहरूले सार्वजनिक महत्त्वको प्रस्ताव दर्ता गरेका हुन्।
प्रस्तावमा देशभर एक महिनाभित्र लम्पी स्किन विरूद्धको खोप लगाउन र सबै गाई-वस्तुहरूको बीमा अनिवार्य गर्न माग गरिएको छ।
त्यस्तै लम्पी स्किन रोग नियन्त्रणका लागि आवश्यक औषधि खरिद् र आपूर्ति गर्न चाहिने बजेट व्यवस्थापन गर्न सरकारको योजनाको माग पनि गरिएको छ।
लम्पी स्किन रोगको कारण पशुधन क्षति भएका किसानहरूलाई तुरून्तै राहत र पुर्नस्थापनाको योजना बनाउन पनि माग गरिएको छ।
‘एक पालिका एक भेटेरिनरी डाक्टर र एक गाँउ एक प्राविधिक’ कार्यक्रमको कार्यान्वयनको स्थितिबारे सरकारसँग विस्तृत प्रतिवेदन माग गरिएको प्रस्तावमा उल्लेख छ।
लम्पी स्किन रोगविरूद्ध नेपालमा नै खोप उत्पादन गर्न के–कस्तो पहल गरिएको छ भन्दै जवाफ पनि रास्वपाले खोजेको छ।
