नेपाली कांग्रेसले सत्य निरूपण तथा मेलमिलाप आयोगसम्बन्धी संशोधित विधेयकमाथि छलफल गरेको छ।
सिंहदरबारस्थित संसदीय दलको कार्यालयमा मंगलबार सभापति शेरबहादुर देउवासहित सांसदहरूले विधेयकका व्यवस्थामाथि छलफल गरेका हुन्।
प्रचार विभाग प्रमुख मीनबहादुर विश्वकर्माले ऐन संशोधनको अवस्थामा रहेको र उक्त विधेयकमाथि आन्तरिक रूपमा छलफल गरिएको बताए।
‘शान्ति प्रक्रियाका बाँकी काम टुंगो लगाउन यथाशीघ्र सत्य निरूपण तथा मेलमिलाप आयोगसम्बन्धी संशोधित विधेयक संसदबाट पारित गर्न जरूरी छ,’ उनले भने, ‘विधेयकका केही व्यवस्था विवादित पनि थिए। द्वन्द्वरत पक्ष, प्रभावित, पीडित र पीडक पक्षको स्वीकार्यमा विधेयक ल्याउनुपर्छ भनेर छलफल भइरहेको छ।’
उनले पार्टी संसदीय दल नेता देउवासहित शीर्ष नेताहरू र सम्बन्धित समितिमा काम गरिरहेका सांसदहरूबीच विधेयकका व्यवस्थाबारे आन्तरिक रूपमा छलफल गरिएको बताए।
‘विधेयकका अप्ठ्यारा विषयलाई फुकाएर पारित गर्नुपर्छ,’ उनले भने।
साथै प्रतिनिधि सभामा देखिएको गतिरोध पनि अन्त्य गरेर कानून निर्माणमा ध्यान दिनुपर्ने उनले बताए।
