नेकपा माओवादी केन्द्रको केन्द्रीय कमिटी बैठक आज पनि जारी रहनेछ।
प्रज्ञा भवन कमलादीमा बिहान ११ बजेदेखि सुरू हुने बैठकमा आज पनि केन्द्रीय सदस्यहरूले धारणा राख्नेछन्।
बुधबारदेखि सुरू भएको बैठकमा पार्टीका अध्यक्ष पुष्पकमल दाहाल ‘प्रचण्ड’ले राजनीतिक तथा सांगठनिक प्रतिवेदन पेस गरेका थिए।
हिजो सो प्रतिवेदनमाथि १८ जना केन्द्रीय सदस्यहरूले धारणा तथा सल्लाहसुझाव राखे।
हिजै अध्यक्ष प्रचण्डले केन्द्रीय कमिटीमा २४ महिला सदस्य थप गरी ४०९ पुर्याउने गरी विधान संसोधनको प्रस्तावलाई बैठकले पारित गरिसकेको छ।
बैठकमा धारणा राख्ने केन्द्रीय सदस्यहरूले संगठनको आकार सानो बनाउने अध्यक्षको प्रतिवेदनमा भनिएको तर पहिलो दिन नै संख्या थप गरेर ४०९ सदस्यीय पुर्याइनु आफैंमा विरोधाभासपूर्ण रहेको बताएका थिए।
केही केन्द्रीय सदस्यहरूले प्रचण्डको सचिवालयमा परिवारका सदस्य राखिएकोप्रति प्रश्न उठाएका थिए।
हिजो धारणा राख्न नाम टिपाएका ७४ जनामध्य बाँकी रहेकाले आज बोल्नेछन्।
प्रत्येक सदस्यलाई आफ्नो धारणा राख्न पाँच मिनेटको समय निर्धारण गरिएको छ। यसपालि सकेसम्म सबै सदस्यहरूलाई बोल्न दिने माओवादीको तयारी छ।
बैठकमा केन्द्रीय सदस्य, वैकल्पिक केन्द्रीय सदस्य, विभिन्न आयोगका पदाधिकारी र प्रदेश पदाधिकारी गरी ७५८ जना सहभागी छन्। बैठक साउन २१ सम्म चल्नेछ।
