नेकपा माओवादी केन्द्रका उपमहासचिव एवम् संगठन विभाग प्रमुख जनार्दन शर्माले आफू जहिले पनि अध्यक्ष प्रचण्डको साथमा हुँदा पनि अनेकथरी भनिएको भन्दै गुनासो गरेका छन्।
प्रज्ञा प्रतिष्ठान कमलादीमा जारी माओवादी केन्द्रको केन्द्रीय कमिटी बैठकको चौथो दिन धारणा राख्दै आफूले कहिले असहयोग गरें खुलस्त पार्न प्रचण्डसँग माग पनि गरेका छन्।
‘अध्यक्षले चाहँदा र परिस्थितिले माग गर्दा, वैचारिक राजनीतिक निर्णय लिँदा, गठबन्धन बनाउँदा जतिखेर पनि खटनपटनमा लागेकै छु। स्वतन्त्र व्यक्ति राष्ट्रपति बनाउनुहुँदैन, पार्टीबाट बनाउनुपर्छ, सभामुख र राष्ट्रपति एउटै पार्टीको बनाए थप समस्या आउँछ भनेर तैंले बाहिर बोल, वातावरण बना भनेर अध्यक्षले आदेश दिँदा आफ्नो मत थाँती राखेर भएर पनि पालना गरेकै छु,’ शर्माले भने।
प्रचण्डलाई सहयोग गर्दै आएपनि आफूमाथि असहयोगको आरोप लागेको भन्दै उनले गुनासो गरे।
‘होला कहिलेकाहीँ आँखा जुधाएर कुरा गर्न मन लाग्छ गरिन्छ पनि तर त्यसैलाई असहयोग गर्यो भनेर नानाथरी बिल्ला भिडाउने? अध्यक्ष कमरेडले भन्नुपर्यो, कुन चाहीँ अप्ठ्यारो मोडमा तपाईंले मेरो साथ सहयोग पाउनुभएन?,’ उनले प्रश्न गरे।
नेता शर्माले सरकारले गरेको कामको आफूले खुल्ला दिलले प्रंशसा गरेको पनि बताए।
उनले माओवादी नेतृत्वको सरकारले खुल्ला हृदयले शुद्धीकरणको थालनी गरेको बताए।
‘मैले संसदको रोष्ट्रमबाट पनि सबै नेताहरूको सम्पति छानबिन गरौं भनेको छु,’ नेता शर्माले भने, ‘पार्टीभित्र पनि सम्पत्ति छानबिन गर्नुपर्छ भन्नेमा म दृढ छु। तर मन्त्रीको हैसियतले लगाएको समान्य तोकलाई पनि भ्रष्टाचार गरको भनेर चरित्र हत्या गरियो, म फेरि भन्छु छानबिन गरौं कसको सम्पति कति छ?’
शर्माले आफू मन्त्री हुँदा आफूले गरेका कामकारबाहीको विवरण लिखित रूपमा उपलब्ध गराउन पनि तयार रहेको उनले बताए।
