आफैं अध्यक्ष रहेको सामुदायिक वनको काठ हिनामिना गरेको भन्दै मोरङ कांग्रेसका एक नेताविरुद्ध अदालतमा मुद्दा दायर भएको छ।
मोरङ बेलबारी नगरपालिका वडा नम्बर ११ भाउन्नेस्थित सिर्जना सामुदायिक वनका अध्यक्षसमेत रहेका कांग्रेस बेलबारी नगर सभापति छत्रबहादुर लिम्बूविरुद्ध आइतबार अदालतमा मुद्दा दायर भएको हो।
वनको ९५५ क्युफिट काठ घोटाला गरेको आरोप लागेका लिम्बूविरुद्ध मोरङ जिल्ला अदालतमा अभियोग दायर भएको हो।
डिभिजन वन कार्यालय मोरङले लिम्बूलाई फरार प्रतिवादी बनाएर अभियोग लगेको छ।
वन ऐन २०७६ को दफा ४९ अनुसार लिम्बुलाई १ वर्ष कैद र बिगो बरावर १८ लाख जरिवाना वा दुवै सजाय हुने माग दाबी लिएर अभियोग दर्ता गरिएको डिभिजन वन कार्यालय बेलबारीका वन अधिकृत दिपेश मिश्रले बताए।
अदालतमा मुद्दा दर्ता भएकोले सोमबार प्रतिवादीको हकमा पक्राउ पुर्जी जारी हुने मोरङ अदालतका सूचना अधिकारी हेमराज बुढाथोकीले जानकारी दिए।
‘अदालतले पठाएको म्याद भित्र पक्राउ परेर हाजिर भए प्रतिवादीको बयान सुनेर निर्णय हुन्छ। उपस्थित भएनन् भने अदालतले निर्णय गर्नेछ,’ उनले भने, ‘सम्बन्धित इलाका प्रहरी कार्यालयमा पक्राउ पुर्जीको म्यादसहित पठाइन्छ। म्याद तामेल भएको मितिले ३५ दिनभित्र उपस्थित हुनुपर्दछ।’
लिम्बूले सामुदायिक वनको १७ लाख ५५ हजार मूल्य बरावरको ९ सय ५५ क्यूफिट काठ अनियमितता गरेको आरोप छ।
वनको काठ अनियमितता गरेको पाइएपछि डिभिजन वन कार्यालय मोरङले उनीविरुद्ध १४ असारमा मोरङ अदालतमा पक्राउ पुर्जी माग गरेको थियो। अदालतले पक्राउ गर्न अनुमति दिएपछि लिम्बू फरार छन्। फरार भएका लिम्बुलाई पक्राउ गर्न डिभिजन वन कार्यालयले इलाका प्रहरी कार्यालय बेलबारीलाई पत्रचार गरेको थियो।
वन कार्यालय स्रोतले भने फरार लिम्बू राजनीतिक संरचक्षणमा विराटनगरमा रहेको हुन सक्ने आशंका गरेको छ। अदालतबाट धरौटी खुलाउने र धरौटी रकम बुझाएर मुद्दाको निरुपण गर्ने तयारीमा उनी लागिपरेको वन स्रोतको भनाइ छ।
डिभिजन वन कार्यालय मोरङले बनाएको छानबिन समितिको प्रतिवेदन अनुसार लिम्बूले सामुदायिक वन भित्रको घाटगद्दीमा रहेको साल र अन्य विभिन्न प्रजातिका काठ आफूखुसी विक्री गरी सामुदायिक वनको साढे १७ लाखभन्दा बढी रकम अपचलन गरेका छन्। उनी चार वर्षदेखि वनको अध्यक्ष छन्।
