नेकपा एकीकृत समाजवादीका अध्यक्ष माधवकुमार नेपालले पार्टीले वैकल्पिक शक्ति बन्ने आधार नगुमाएको बताएका छन्।
शनिबारबाट सुरू भएको स्थायी कमिटी बैठकमा सदस्यहरूले उठाएका प्रश्नको जवाफ दिने क्रममा उनले पार्टीसँग वैकल्पिक शक्ति बन्ने सामर्थ्य बाँकी रहेको बताएका हुन्।
'हाम्रो शक्ति कमजोर होइन, छैन। यो पार्टीसँग सशक्त वैकल्पिक शक्ति बन्ने निकै राम्रो आधार छ,' अध्यक्ष नेपालको भनाइ उद्धृत गर्दै पार्टीका उपमहासचिव तथा प्रवक्ता जगन्नाथ खतिवडाले भने, 'विचार र व्यवहारमा हामीभन्दा प्रस्ट र उत्कृष्ट अरू को छ?'
नेपालले विद्रोहको औचित्य पुष्टि भएको समेत बताएका थिए। यसलाई संख्यामा तुलना गर्न नहुने उनको जोड थियो।
पार्टीका सम्मानित नेता झलनाथ खनाल लगायतले विद्रोहको औचित्य पुष्टि हुन नसकेको र पार्टी माथि फुक्ने र तल सुक्ने क्रममा रहेको बताएका थिए। नेता खनालले त पार्टीको माथिल्लो संरचनालाई रावणको टाउकासँग समेत तुलना गरेका थिए। उनले पार्टी उल्टो संरचनामा रहेको टिप्पणी पनि गरे। पार्टीको राजनीतिक कार्यदिशा प्रस्ट नभएपछि कतिपय एमालेमा फर्किन थालेको भन्दै उनले चिन्ता व्यक्त गरेका थिए।
अध्यक्ष नेपालले त्यसैको जवाफ दिएका हुन्।
'संख्या बढ्न समय लाग्छ छ। अबका दिनमा हाम्रो संख्या बढाउने काममा केन्द्रित गर्न तयारी गरिरहेका छौं। केन्द्रीय कमिटी बैठकले त्यो दिशानिर्देश गर्नेछ। हाम्रो पार्टीले संगठनको तीनवटै क्षेत्र; सडक, संसद र सरकारमा काम गर्नेछ। जनताको र देशको हित नै हाम्रो कामको केन्द्रबिन्दु हुनेछ। त्यसैले हामी जनसरोकारका विषयमा गम्भीर भएर लाग्नेछौं,' अध्यक्ष नेपालको भनाइ उद्धृत गर्दै प्रवक्ता खतिवडाले भने।
स्थायी कमिटीमा उठेका कुरालाई संश्लेषण गरेर दस्तावेज पोलिटब्युरोमा लैजाने र त्यहाँ उठेका कुराहरू केन्द्रीय कमिटीमा लगेर छलफल गर्ने एकीकृत समाजवादीको तयारी छ।
शनिबार र आइतबार बसेको स्थायी कमिटी बैठकमा ३० जना सदस्यले आफ्नो धारणा राखेका थिए। सम्मानित नेता झलनाथ खनालले १६ बुँदे अलग्गै दृष्टिकोण पेस गरेका थिए।
पोलिटब्युरो बैठक भदौको ३ र ४ गते बस्नेछ भने केन्द्रीय कमिटी भदौकै ५, ६ र ७ गते काठमाडौंमा तय गरिएको छ।
अध्यक्ष नेपालले माघमा महाधिवेशन गर्ने प्रस्ताव सचिवालय र स्थायी कमिटीमा गरेका छन्। केन्द्रीय कमिटीले मितिको टुंगो लगाउने प्रवक्ता खतिवडाले बताए।
