केही समयदेखि अबरूद्ध हुँदै आएको संघीय संसदअन्तर्गत प्रतिनिधि सभा र राष्ट्रिय सभा सुचारू गर्न सत्तापक्ष र प्रमुख प्रतिपक्षीसहित दलहरूसँग छलफल गर्ने नेकपा माओवादी केन्द्र संसदीय दलले निर्णय गरेको छ।
सिंहदरबारमा सोमबार बसेको संसदीय दल बैठकले सदन सुचारू गर्न ठोस छलफल गर्ने निर्णय गरेको प्रमुख सचेतक हितराज पाण्डेले जानकारी दिए।
सुन प्रकरणमा उच्चस्तरीय छानबिन समिति गठन गर्न माग गर्दै प्रमुख प्रतिपक्षी नेकपा एमालेले प्रतिनिधि सभा र राष्ट्रिय सभा अबरूद्ध गर्दै आइरहेको छ।
‘सदन अबरूद्ध भइरहेको छ। कसरी सुचारू गर्ने भन्ने विषयमा संसदीय दल बैठकमा हामीले छलफल गरियो,’ पाण्डेले भने, ‘दुवै सदनका गरी १२ जना सांसदले धारणा राख्नुभयो। प्रधानमन्त्रीसमेत रहनुभएका दल नेता पुष्पकमल दाहाल प्रचण्डले सत्तापक्ष र प्रमुख प्रतिपक्षीसहित दलका नेताहरूसँग ठोस छलफल गरेर निचोड निकाल्ने र सदन सुचारू गर्ने कुरा राख्नुभएको छ।’
उनले संघीय शिक्षा विधेयक, संघीय निजामती सेवा विधेयक र प्रहरी विधेयक अगाडि बढाउनुपर्ने पनि बताए।
साथै संसदीय दल बैठकमा संसदका समिति सभापति चयन गर्ने विषयमा पनि छलफल भएको थियो।
सदन अवरोध हटाउन सभामुख देवराज घिमिरेले पनि आजै शीर्ष नेताहरूसँग छलफल गर्ने तयारी गरेका छन्।
