सदन खुलाउन सत्ता र प्रमुख प्रतिपक्षी दलका शीर्ष नेताहरू पुन: छलफलमा जुटेका छन्।
बानेश्वरस्थित संघीय संसद भवनमा सभामुख देवराज घिमिरेसहित प्रधानमन्त्री पुष्पकमल दाहालसहित सत्ता र प्रमुख प्रतिपक्षी नेकपा एमालेका अध्यक्ष केपी शर्मा ओलीलगायतबीच सोमबार अपराह्न छलफल भएको हो।
छलफलमा नेपाली कांग्रेसका सभापति शेरबहादुर देउवा पनि छन् भने कांग्रेस, एमाले र माओवादीका प्रमुख सचेतकहरू पनि सहभागी छन्।
संसद सुरू गर्ने विषयमा सभामुख घिमिरेले पहल गरिरहेका छन्।
आज दिउँसो पनि शीर्ष नेताहरूसँग सभामुख घिमिरेले छलफल गरेका थिए।
दलहरूबीच सहमति नभएकोले आज दिउँसो १ बजे बस्नुपर्ने प्रतिनिधि सभा बैठक पनि सुरू हुन सकेको छैन। अपराह्न ४ बजेसम्म प्रतिनिधि सभा बैठक स्थगित गरिएको थियो।
प्रमुख प्रतिपक्षी एमालेले सुन प्रकरण छानबिनका लागि उच्चस्तरीय समिति गठन गर्नुपर्ने माग गर्दै सदन अवरोध गरिरहेको छ।
