सदनको अवरोध हटाउनेबारे सत्ता र प्रमुख प्रतिपक्षी नेकपा एमाले बीचको छलफल निष्कर्षविहीन भएको छ।
सोमबार अपराह्न संघीय संसद भवन नयाँ बानेश्वरमा सभामुख देवराज घिमिरे, प्रधानमन्त्री पुष्पकमल दाहाल ‘प्रचण्ड’सहित सत्ता र प्रमुख प्रतपक्षी दलका शीर्ष नेताहरूबीच छलफल भएको थियो।
नेपाली कांग्रेसका सभापति शेरबहादुर देउवा, एमालेका अध्यक्ष केपी शर्मा ओली र तिनै दलका प्रमुख सचेतक र सचेतक बैठकमा सहभागी थिए। छलफल बिनानिष्कर्ष टुंगिएको एमाले सचेतक महेश बर्तौलाले बताए।
‘हामीले सुन प्रकरण छानबिन गर्न उच्चस्तरीय समितिको माग राख्यौं। उहाँहरूले सत्ता गठबन्धनमा छलफल गर्न अलिकति समय माग गर्नुभयो। आजको बैठक सकियो, निष्कर्षमा पुग्न सकिएन,’ उनले भने।
सभामुख घिमिरेको पहलमा सोमबार मध्याह्न पनि शीर्ष नेता, प्रमुख दलका मुख्य सचेतक, सचेतकहरूबीच छलफल भएको थियो।
साढे तीन बजे पुनः बसेर निष्कर्षमा पुग्ने भने पनि दुवै पक्षको अडानका कारण छलफल टुंगोमा पुग्न सकेन।
सुन प्रकरण छानबिन गर्न समिति बनाउने विषयमा सहमति जुट्न नसकेपछि प्रतिनिधि सभाको बैठक मंगलबार अपराह्न ३ बजे सम्मका लागि स्थगित भएको छ।
सूचना टाँसेर बैठक स्थगित गरिएको यो तेस्रो पटक हो।
साउन १० गते बसेको प्रतिनिधि सभा बैठकमा एमालेले सुन प्रकरण छानबिन गर्न उच्चस्तरीय समिति माग गर्दै बैठक चल्न दिएको थिएन। त्यसपछिका दुई वटा बैठक पनि सूचना टाँसेरै स्थगित भएको थियो।
सदनको अवरोध हटाउने विषयमा सभामुख घिमिरेले साउन १५ र १६ गते प्रधानमन्त्री र विपक्षी दलका नेतासँग दुई–दुईपटक टेलिफोनमा कुराकानी गरेको पनि उनका प्रेस सल्लाहकार शेखर अधिकारीले बताए।
त्यसबीचमा प्रमुख दलका प्रमुख सचेतक र सचेतकसँग विभिन्न चरणमा ६ पटक भन्दा बढी छलफल गरे पनि समस्याको समाधान निस्कन सकेको छैन।
