उपप्रधान तथा गृहमन्त्री नारायणकाजी श्रेष्ठले विगतमा उच्चस्तरीय छानबिन समिति बनाएर छानबिन गर्दा एक ग्राम पनि सुन पत्ता लाग्न नसकेको जवाफ दिएका छन्।
प्रमुख प्रतिपक्षी दल नेकपा (एमाले)ले एक क्विन्टलभन्दा बढी सुन बरामद् प्रकरणमा उच्चस्तरीय समिति बनाउन माग गरिरहेका बेला गृहमन्त्री श्रेष्ठले यस्तो जवाफ दिएका हुन्।
‘नेपाललाई सुन तस्करीको ट्रान्जिट बनाउनेमात्र होइन, नेपालको अर्थतन्त्रलाई धराशायी बनाउने कुरा हो यो। यसले छिमेकी देशको अर्थतन्त्रसमेत धराशायी बनाउँछ। हिजो नि भएको थियो भनेर चुप लाग्ने अवस्था छैन,’ मंगलबार प्रतिनिधि सभामा सांसदहरूले उठाएका प्रश्नको जवाफ दिँदै उनले भने, ‘हामी सबै मिलेर यो जालो तोडौं। मुख्य रूपमा सरकारकै दायित्व हो।’
उनले सुन प्रकरणमा दोषीलाई सम्पूर्ण रूपले कारबाहीको दायरामा ल्याउने र विमानस्थलको व्यवस्थापन पुनःविचार गर्ने सरकारको योजना रहेको बताए।
‘विमानस्थलको सुरक्षा र व्यवस्थापनको नयाँ नीति र कार्यक्रम लागु गर्नुपर्छ,’ उनले भने,‘कसैले त्रिभुवन विमानस्थलअगाडि नसमातेर मालिकसम्म जान दिएको भए हुन्थ्यो पनि भन्नुभएको छ। तर, विगतमा सुन गायब भएर मानिसको हत्या हुने श्रृंखलालाई बुझेर राजस्व अनुसन्धानले तुरून्तै पक्राउ गरेको हुनुपर्छ।’
सुन तस्करीको जालो तोड्न संसदीय समिति बनाएर छानबिन गर्दा पनि निष्कर्षमा पुग्न नसकेको उनले बताए। एमाले अध्यक्ष केपी शर्मा ओली प्रधानमन्त्री भएको बेला छानबिन समिति बनाउँदा पनि एक ग्राम सुनसमेत फेला पार्न नसकेको उनले बताए।
‘सरकारले त्यतिबेला छानबिन समिति बनाएको हो, एक ग्राम पनि सुन पत्ता लगाउन सकेन, राज्यको संयन्त्रलाई जिम्मेवार बनाउनुपर्छ। संगठित अपराधको अनुसन्धानको समय ६० दिन हुन्छ। २० दिन राजस्व अनुसन्धान विभागले छानबिन गरेको छ। अब ३५ दिन सिआइबीले अनुसन्धान गरेर पहिचान गर्छ, यसको नेक्ससलाई कारबाहीको दायरामा ल्याउँछ,’ उनले सदनसमक्ष भने।
