जनमत पार्टीले राइट टु रिकललाई लागु गर्ने अभ्यास थालेको छ।
शनिबार पार्टीबाट निर्वाचित जनप्रतिनिधिहरुको मूल्यांकन गर्न ‘एप्रुभल रेटिङ’का लागि मतदान भएको छ।
पार्टीबाट निर्वाचित पालिका प्रमुख, उपप्रमुखदेखि वडा अध्यक्षसम्मको मूल्यांकनका लागि विहान ९ बजेदेखि मतदान सुरु भएको मतदान जारी रहेको पार्टीका सचिव वीपी साहले जानकारी दिए।
‘राइट टु रिकल’को प्रावधान राखेको जनमत पार्टीले आफ्ना जनप्रतिनिधिहरुले जनताको चाहना अनुसार काम गरेको वा नगरेको मूल्यांकनका लागि पहिलो पटक एप्रभुल रेटिङ्ग गरेको हो।
सचिव साहका अनुसार जनमत पार्टीका निर्वाचित स्थानीय निकायको २२ स्थानमा विहानदेखि मतदान भइरहेको छ भने वर्षाका कारण केही स्थानीय निकायमा मतदान प्रक्रिया ढिलो भएको छ ।
मतदान गराउन पार्टीले निर्वाचिन अधिकारीसमेत तोकेर स्थानीय तहमा खटाएको छ ।
एप्रुभल रेटिङ्गको मतदानका लागि २६ जना निर्वाचन अधिकारी केन्द्रबाटै खटाइएको छ । निर्वाचन कार्यतालिका अनुसार मंगलबार मतदाताको नामावली प्रकाशन गरिएको थियो भने दावी विरोधका लागि दुई दिनको समय दिइएको सचिव साहले जानकारी दिए।
२०८० बैशाख ३० गतेभन्दा अगाडि जनमत पार्टीको सदस्यता लिएकाहरुले मात्र मतदान गर्न पाउनेछन्।
स्थानीय जनप्रतिनिधिहरुको मतदान गराएर मूल्यांकन गराउने अभ्यास नेपालमा पहिलो पटक हुन लागेको सचिव साहले दाबी गरे।
