नेकपा माओवादी केन्द्रका उपमहासचिव वर्षमान पुनले माओवादीलाई ‘स्मार्ट’ पार्टी बनाउनुपर्ने बताएका छन्।
पार्टी सम्बद्ध महिला संगठन नेपाल महिला संघ (क्रान्तिकारी)ले राजधानीमा आयोजना गरेको कार्यक्रममा पुनले अहिलेको साइबर युग सुहाउँदो पार्टीले मात्रै मुलुकको नेतृत्व गर्न सक्ने र माओवादीलाई त्यस्तो पार्टी बनाउनुपर्ने बताएका हुन्।
‘समयअनुसार चल्न नसक्ने पार्टीहरु इतिहासमा सीमित भएका छन्’, पुनले भने, ‘अहिलेको साइबर युगमा स्मार्ट पार्टी बनाउन जरुरी छ, त्यस्तो पार्टीले मात्र आजको युगको सही प्रतिनिधित्व गर्न सक्छ ।’
कम्युनिष्टहरुले डिजिटल प्रविधि र कृत्रिम बौद्धिकताको समेत प्रयोग गरेर स्मार्ट पार्टी निर्माण गर्नुपर्ने बताए।
पुनले संघर्षको स्थिति र विकासको प्रक्रिया अनुरुप संगठनको रुपहरुको खोजी गरिएको बताए । यस्तै लक्षित जनसमुदाय तथा आफ्नो पार्टी र संगठनमा भर पर्र्नुपर्ने चिनियाँ कम्युनिष्ट नेता माओको भनाइ अनुसरण गर्न पार्टी पंक्तिलाई निर्देशन दिए ।
पुनले महिला अधिकार स्थापित गर्न र समाजमा महिलाहरुको सम्मान तथा सहभागिता वृद्धि गर्न माओवादी आन्दोलनले धेरै ठूलो योगदान गरेको बताए ।
नेपालको संविधानले राज्यका सबै तहमा कम्तिमा ३३ प्रतिशत महिला सहभागिता ग्यारेण्टी गरेको उल्लेख बताउँदै आफ्नो दलले भने गाउँदेखि केन्द्रसम्म कम्तिमा ३५ प्रतिशत महिला सहभागिता सुनिश्चित गरेको र आगामी दिनमा उक्त प्रतिशत बढाउँदै लैजाने नीति रहेको बताए।
पुनले नेपाली समाजको रुपान्तरण र राजनीतिक परिवर्तनमा माओवादी जनयुद्धले खेलेको भूमिकालाई संसारले स्वीकार गरिसकेको भन्दै त्यसको अवमूल्यन कसैले गर्न नसक्ने तर्क गरे।
